Shillong, Naitung 03 : Ka lehniam Behdeinkhlam, ka tamasa ba 4 sngi jong ki Pnar, kala kut noh hynne ka sngi Balang hapdeng ka jingshongshit bad ka rong ka rup bad ka jingiashimbynta da ki hajar ngut ki khun ki hajar ka Sein Raij.
Haba pynpaw ia ka jingkmen ban iadonlang ha ka tamasa, u Myntri Rangbah ka Jylla Conrad K Sangma ula ong “Nga shim ia kane ka kabu ban ai khublei Behdeinkhlam ba kmen ia baroh ki paidbah ka Jylla. Kane ka dei kawei na ki tamasa ba kongsan bha ka Jylla.
Kane ka dei ka sien kaba lai ba nga la wan bad don bynta lang ha kane ka tamasa bad kat kaba ngi wan hangne, kala nang itynnad bad nang phuh da ki rong ki rup bad nga itynnad ia ka rukom lehkmen ki briew”.
Haba kdew ia ka jingkongsan ban kyntiew ia ka dustur tynrai jong ki paid riewlum, u Conrad ula pyntip ba ka Sorkar Jylla kala pynlut haduh T.6.5 klur ban shna ia ki jingtei bad pynitynnad ia ka madan Aitnar.
“Ngi kmen palat ba ngi lah ban kyrshan beit ia kane ka tamasa kat kaba ngi lah. Kumba phi tip, ki jingtei hangne ki dei kiba la pynshna da ka Sorkar lyngba ka Tnad Tourism kaba long haduh T.6.5 klur. Ngi ngeit ba ka jingpynneh ia ka dustur tynrai jong ka Jylla jong ngi bad jong ki briew jong ngi, ka long kaba kongsan tam”.
Ka Lehniam Behdienkhlam kadei kawei napdeng ka lehniam lehrukom tynrai kaba heh tam jong ki Pnar ha Meghalaya. Ka Behdienkhlam ka dei ka jingleh niam ban beh ia ka khlam jingpang.
Man la u snem la rakhe ia ka Behdienkhlam ha u Naitung hadien ba la dep ban thung kba bad ka dei ruh ka shad kaba kongsan tam jong ki riewlum Jaintia.
Ha ka por jong ka jingrakhe iaka Behdienkhlam, ki riewngeit ki pan iaka jingkyrkhu kyrdoh na u Blei Trai Kynrad na ka bynta ban bha ka rep ka riang.
Ha katei ka shad ki kynthei kim ju iashimbynta ha kaban iashad hynrei ki pynkhreh ia ka bam ka dih na ka bynta ban ai sha kito kiba la khlad noh.
Ia ka jinglehniam Behdienkhlam la pynlong ha Jowai bad kadei ka jinglehniam lehkmen kaba pawnam bha ha ka jylla.
Kumno la rakhe iaka Leniam Behdienkhlam?
Ha kane ka sngi, ia ka niam ka rukom la leh da u Daloi bad ki samla shynrang ki iashimbynta ha ka lehniam lehrukom ha kaba ki leit ha ki ïing ki sem ban beh iaka khlam, ki jingpang bad iaka sniew ka smeh da kaba tied ia ki tyrsad ïing da ki siej.
Kawei na ki bynta kiba paw bha ha kane ka lehniam lehrukom ka dei ka jingiaknieh ki ar kynhun jong ki shynrang ban ioh ktah ia u khnong ba la wanrah ha jaka shad Behdienkhlam kaba la tip kum ka Wah-eit-nar.
Da ki spah ngut ki shynrang ki rung bad kyrsum ha katei ka lympung shad kaba dap da ka um bad ka ktieh.
