Shillong Naiwieng 02: Ka Shad Nongkrem kaba ju pynlong man la u snem da ka Hima Khyrim ha ïingsad, Smit, kala kut noh hynne ka sngi nyngkong ha ka jingiphuh iphieng da ka jingia shimbynta shitrhem da ki rang kynsai bad ki thei samla kiba dei ki Khun ki Hajar ka Hima.
Ka shad Nongkrem bad ka Pom Blang ba ju pynlong ha u bnai Naiwieng manla u snem, kadei shi bynta na ka jingleh niam ki khun ki hajar jong ka Hima Khyrim ban ainguh ia ka ‘Lei Synshar’ na ka bynta ka bha ka miat jong u khun u hajar ha baroh ki liang haka jingim jongki ba man la ka sngi, la ka long haka rep ka riang, ka ioh ka kot, ka shongsuk shongsain, ka pule puthi bad kiwei kiwei.
Kane ka jingleh niam kala sakhi ia ka jingwan tuid jong ki nongwan peitkai na kylleng ka Ri-lum Khasi Jaintia, ki briew ba lum jingtip ia ki kolshor, ki nongshondur, nongshna video bad ruh ki nongshangkai pyrthei napoh ka Ri bad nabar ruh kumjuh.
Ha kane ka sngi la wan ban sakhi ia kane ka Shad Tynrai u Khasi da u Symbud Myntri Rangbah ka Jylla Bah Prestone Tynsong, u Chief Secretary ka Jylla Bah D.P Wahlang, Deputy Commissioner R. M Kurbah, CEM Pyniaid Sing Syiem, MDC Fantin Lakadong, Grace Kharpuri, Lamphang Blah, P. N Syiem, MLA Ardent Miller Basaiawmoit, Shakliar Wajri, DGP ka Meghalaya, Dr Dr. Lajja Ram Bishnoi bad kiwei kiwei.
Ha ka por janmiet, u Syiem ka Hima Paiem Balajied Syiem ha ryngkat ki Lyngdoh, kila pyndep ia ka jinglehniam Pomblang ban pynsngewbha ia ka Lei Synshar-ka Lei Lum Shillong. Ia kane ka jingainguh la air uh sha ki Manbei jong ka Kur Syiem.
Lah ban kdew hangne ba ka Pom Blang bad ka Shad Nongkrem ka dei kaba la pynlong da ki spah snem wat hashuwa ka jingbuh jingthoh kaba dei ha u snem 1931 AD.
U Syiem ka Hima ula pyntip ba ka Shad Nongkren naduh b aka sdang da ki spah snem, ka dei ka jinglehniam ban rakhe ia ka jingainguh jong ki Khun ki Hajar ka Hima sha u Blei Nongbuh Nongthaw ba un kyrkhu kyrdoh baroh shisnem bad ka dei ruh ka jinglehkmen ban tehsong ia ka jingialong kawei jong ka thain kaba hap hapoh ka Hima Khyrim.
U Syiem ula pyntip ba ha kane ka jinglehniam ba mynta, kila don haduh 288 ngut ki nongshad ba kynthup ia 118 ngut ki Kynthei bad 170 ngut ki Shynrang.
U Symbud Myntri Rangbah ka Jylla Bah Prestone Tynsong ula ong ba ka Pomblang lane ka Shad Nongkren ka pyni ia ka jingriew spah ka kolshor bad ka jinglehniam tynrai jong u Khasi. Ula pynpaw ia ka jingkmen ba ula ioh iadon bynta lang ha kane ka jinglehniam bad ai khublei Shad Nongkrem ia baroh.
