Shillong Iaiong 27: Ka ophis jong u District Sports Officer ka East Khasi Hills ha ka sngi Thohdieng kala pynhap pyrda noh ia ka District Level Inter School Athletic Meet kaba la pynlong ha SAI, STC Shillong.
Ha kane ka lympung iakob ialehkai la wan ban iashimbynta da ki khynnah na ki skul kiba don ha kylleng jong ka East Khasi Hills ha kaba kila iashimbynta ha ka jingiakob ha ki kyrdan U-18, U-16 bad U-14 Boys and Girls kiba kynthup mareh, ka Relay Race, Long Jump, High Jump, Shot Put bad kiwei kiwei.
Ki nongialehkai wat hapdeng ka jingshit kyrang ka sngi kila sei la ka sap ka phong ban ioh khur ia ki takma bad ki khynnah kiba jop ha kane ka lympung kin shah jied ban mihkhmat ia ka East Khasi Hills District ha ka Inter School State Level Athletic Meet kaban long ha u bnai ban wan.
Ia kane ka jingiakob la pynhap pyrda noh da u Director jong ka School Education and Literacy u Swapnil Tembe kum u kongsan ha kaba ula sam ia ki khusnam sha ki khynnah skul kiba la jop ha ki jingiakob ki bapher bapher.
Ia ka nam Best Athelete ha ka U-14 Boys la ioh da u Donboklang R Marak na ka 1ST MLP Batallion Secondary School katba ha ka liang ki kynthei la ioh da ka Amandy Rumnong jong ka Loreto Convent School.
Ha ka U-16 ia ka nam Best Athelete ha ka liang ki shynrang la ioh da u Betting Sangma jong ka Garo Union Secondary School katba ha ka liang ki kynthei la ioh da ka Kasanchi Marak jongka Garo Union Secondary School, ha ka U-18 Boys la ioh da u Damebansan Gareth P Rymbai jong ka St Edmunds School katba haka liang ki kynthei la ioh da ka Chitra Malik jong ka St Mary’s School.
Ka Army Public School kala ioh rah ia nam Lahduh ha ka U-14 Boys katba ka skul Loreto Convent kala rah ia ka nam lahduh ha ka liang ki Kynthei.
Ha ka U-16 boys ia ka nam lahduh la iohrah da ka St Anthony’s Hr Secondary School, Shillong katba ha ka liang ki kynthei la ioh da ka Garo Union Secondary School.
Ha ka U-18 ia ka nam lahduh ha ka liang ki shynrang la iohrah da ka H Elias Memorial Hr Secondary School katba ha ka liang ki kynthei la ioh da ka St Mary’s Hr Secondary School.
