Nongstoiñ, Nailar 24: Ka Hill State People Democratic Party (HSPDP) ha Nongstoiñ constituency ka dei ka party kaba la long doh long snam, kaba la suhtied ha uwei pa uwei u nongshong shnong hapoh ka constituency baroh kawei. U nongmihkhmat jong katei ka party u (L) bah Hopingstone Lyngdoh u la long u nongmihkhmat naduh ba sdang haduh ba un da khlad noh na kane ka pyrthei.
Dei hadien ka jingkhlad noh jong u, ba ka Nongstoiñ ka dang don їa u nongmihkhmat u ba la jop ha ka election shiteng samoi ha ka jaka jong u (L) bah Hopingstone kata u bah Diostraness Jyndiang. Hynrei mar їa kut ka samoi treikam jong u kum u nongmih bujli ha ka jaka u (L) bah Hopingstone Lyngdoh, ka party ka la pra syndon phum bad ha ka election 2018 u nongmihkhmat uba la їakhun na katei ka party u la shah rem kput ha u kyrtong ka NPP.
Hadien kata ha ka election MDC kaba la long ha u snem 2019, u kyrtong na katei ka party u la shah rem kput ha u kyrtong ka Congress. Ha u snem ba la dep ki nongїalam ba ha khlieh duh ka party, ki la pyrshang ban lum lang biang sa shisien pat їa ki nongїalam jong ka party na ka bynta ban pynwan dur pat sa sien ha kaba baroh ki nongkitkam bad ki dkhot jong ka Executive Committee ryngkat ki nongkitkam jong ka area unit ki la poi sha ka jingїasngewthuh jingmut bad ka jingїatylli.
Kaba lyngngoh ka long ba dei ha u ne u snem 2022, ba ka party ka la sdang ban pynkhreh їa ka election ka ban long ha u snem ban wan kata ha u 2023, ba ka la don ka jingїapher jingmut kaba jur hapdeng ki nongkitkam bad ki dkhot jong ka Executive Committee, kat haduh ba ka Sub Committee jong ka HSPDP Central body kaba la long ha ka 23 tarik ha Shillong, ka la hap ban shim їa ka rai kaba tyngeh da kaba pynwai noh shipor їa ka jing trei kam jong ka Executive Committee jong ka area unit ba kynthup їa ka parents body, ka youth bad womens wing bad їa ki kam baroh kiba їadei bad ka party hapoh ka area unit la shimti noh shipor da ka cntral body tad haduh ban da pynbeit da kumwei pat.
Dei hadien ba ka Sub Committee jong ka central body ha ka janmiet sngi hat majai ka 23 tarik Nailar ka la pyntip da ka shithi sha u president bad u secretary jong ka area unit, ba ka la pynwai noh їa ka jingtreikam jong ka area unit, ba ki nongkitkam barim ka EC ki la їakynduh lang ha ophis trei kam jong ka party ban pynsngew їa katei ka shithi.
U bah Donbok Thabah nongkitkam barim ka EC jong ka area unit, u la ong ba na ka liang jong ki, ki pdiang sngewbha sngewbha їa ka jingpynwai noh jong ka central body їa ka EC jong ka area unit. Hynrei ki kwah pat ba їa u kyrtong na ka bynta ka election ban wan ka dei ban aiti sha ki primary unit ba kin jied.
Ha kajuh ka por u la ong ba ka long kaba shisha ba ha kine ki sngi la mih ar kynhun ha ka party, ka central body ka la leh їa kaba dei eh khnang ba kan ym don shuh kano kano ka jingїapait, ynda la jied da ki nongkitkam bad ki dkhot ba thymmai.
