Shillong, Naitung 12: Ha ka jingai ia ka kyrwoh kaba kit jingmut, ka Myntri kaba khmih ia ka tnad Ain ka Kong Ampareen Lyngdoh kala iengskhem ba ka sorkar jylla ka kut jingmut ban pynkhlain ia ka jingai jingiada ia ki longkmie bad ia ki khynnah kynthei, ha kaba iadei bad ka ain ka kanun bad kumjuh ruh ha kaban kyntiew ia ka jinglong jingman ha ka imlang sahlang.
Haba kren ha kaba iadei bad ki jingjia kiba dang shen halor ki kam thombor, ka Kong Ampareen kala pynbna ba ka jylla kala shimkhia ha kaban khmih bniah ia ki jingpynkylla kiba iadei bad ka Criminal Procedure Code bad wad ia ki lad ki lynti ban pyniar ia ka rukom treikam jong ki Women Police Station ha kylleng jong ka Meghalaya.
Kala banjur ba watla ka jingkhmih bniah ka long kaba kongsan, hynrei ka jingkylla kaba shisha ka wan lyngba ki iing ki sem bad ki shnong ki thaw. “Ngi hap ban leit sha ki shnong ki thaw bad sha ki Balang. Ka jingkitkhlieh kadei ban sdang ha ki kyrdan jongki longiing longsem bad ban roi shapuh u pud ban long ka jingsngewkhia ha ki shnong ki thaw. Ki nongialam ha ki Balang kidei ban iadonbynta lang” kala ong.
Ka myntri kaba la leit ban iashimbynta ha ka jingon tep ia kawei ka longkmie kaba la shah pyniap ha Mairang, kala ong, ba katei ka jingjia kadei ka jingpynkynmaw ba kumno ki longkmie ki dang iai mad ia ka jingshah thombor watla ki don ha ki jaka kaba kidei ban sngew shngain.
“Haba u Panah u leh be-ijot ia la ka Khunruit, kam dei tang ka mat kaba iadei bad ka ain ka kanun hynrei ka jingiapait iapara hapoh ka iing ka sem” kala ong bad ka banjur ba ka donkam ban shimkhia ha kaba iadei bad ka jingsngew, ka rukom pyrkhat bad ki jingshimkhia ha ka imlang sahlang kaba iaid ryngkat bad ki sienjam kiban shim da ka ain.
Ka Kong Ampareen Lyngdoh kala kubur ba watla ki kam sniew kila pynkyndit ia ki paidbah, hynrei ki pyni ruh ia ka jingkiew jong ka jingsngewthuh ki paidbah bad ka jingkloi ban ai iaki jingujor ia kum kitei ki jingjia.
“Kitei ki kam sniew ki lah ban jia ha ki por kiba la dep, hynrei la shu tap noh ia ki hapoh ka nep, Mynta, ka jingwan ujor kala nang kham biang bad ka jingkhublei ka leit sha ka jingai jinghikai pynsngewthuh, hynrei ka mut ruh ba ngi dei pat ban nang pynkhlain shuh shuh ia ka rukom treikam ka jong ngi” kala bynrap.
Kala iaroh ruh ia ka jingshimkhia mardor jongki bor ka ain bad kala pynpaw ia ka jingkyrmen ba hapoh ka jingialam jong ka Longkmie kum ka Director General of Police (DGP) kan kyntiew ia ka jingshimkhia mardor.
“Ki pulit kila shimkhia mardor tangba ngim lah pat ban shu shaniah beit tang ha ki. Ka jingiashimbynta lang ka shnong ka thaw ka long kaba kongsan” kala banjur.
Ha kaba iadei pat bad ka jingbym mih shakhmat ki longkmie bad ki longing longsem ban ujor haba ki ngat ha ki kam thombor ne jingshah thombor ha ka longrynnieng, ka Kong Ampareen kala ong, ba ka jingshah niewbein, ka jingshah pynbor ha ka imlang sahlang bad ka jingbym shaniah ia ka rukom treikam kidei kiei kiei kiba long kum ki diengpyngkiang.
“Ki longkmie hi, kiba kynrandien ban ujor ia ki ejahar. Ki don ka jingsngew ban shah niewbein, ka jingiathuhkhana lorni bad ka jingmutdur ba ki pulit kin ym leh eiei. Kane kadei ban kylla noh” kala ong bad ka wer ba dei ban don ia ka jingshaniah ha ki bor treikam.
Ka Myntri kala pynpaw ruh ia ka jingdonkam ban don ia ka jingsyllok bad ka bor pyrkhat pyrdain kaba khlain.
“Haba jia ki kam sniew hapoh ka iing, ngi donkam ban kylli ia ka daw tynrai halor jong katei ka jingjia. Hato kadei namar ka jingbym lah ban tehlakam ia ka jingbitar?. Hato ngi don lypa ia kano kano ka rukom treikam kaban shimkhia ia kane ka mat? Ia mynta ngim don” kala ong.
Kala ong ba ka sorkar ka dang trei bad wanrah ia ki sienjam kiba kynthup ban iadonbynta bad ki shnong ki thaw ha kaba ka jingiasyllok kan long kaba kongsan bha bad katto katne ki lad jingpynshitom ia ki katto katne ki nongpynkhein. U Myntri Rangbah bad u Symbud Myntri Rangbah kila ai ka jingkyrshan kaba pura ia ki jingpyrshang ban kyntiew ia ki jaka ban ai jingiada bad ban tei ia ka jinglong jingman kaba shngain ia ki Longkmie bad ki khynnah kynthei ha kylleng jong ka jylla.
“Ngim lah ban kyntait ia kane ka jingshisha kaba la sdang ban roi, Ngi dei ban hikai ia ki longkmie ba kin iada ialade bad ban ai iaki ia ki atiar bad ka jingkyrshan kaba ki donkam. Kane kala jia ha kylleng ki kyrdan, ki longing, ki shnong ki thaw, ki bor treikam bad polisi” kala pynkut.
