Shillong, Lber 07 : U Myntri Rangbah ka Jylla Conrad K Sangma ha ka sngi Thohdieng, ula ong ba ka Sorkar kala kut jingmut hok ban pynheh ia ka Umroi Airport bad ban pynher ia ka liengsuin ba 19-20 seat na Baljek Airport.
“Nga phah ia ka khubor kaba shai ba ngi la kut jingmut ban pynkhlain ia ki lad pyniasoh na suin, da kaba pynthikna ha kaban pynheh ia ka Umroi Airport (ban leh hiar ki liengsuin heh) bad ban sdang ia ka jingpynher liengsuin na Baljek Airport” ong u Conrad ha ka kynta kylli jingkylli hapoh Iingdorbar.
“…ki jingiakren kila jan poi haduh ka kyrdan ba khatduh bad hapoh u 2026 ngi kyrmen ba ngi dei ban leh ban pynher ia ki liengsuin na Baljek Airport” ula pynbna bad bynrap “Ngi la don mynta ha kata ka lynti iaid”.
U MLA ka TMC na Nongthymmai Bah Charles Pyngrope u kwah ban tip la ka Sorkar kan pyrkhat lem ha ka ban shong bishar ia ka jinglah ban pynheh ia ka runway jong ka Baljek Airport ban lah hiar ki liengsuin kiba heh khnang ban lah kiar na kaei kaba jia ha Umroi Airport.
Ia kane, u Conrad ula ong ba u buddien hi shimet ia kane ka kam ha ka kyrdan jong u. “Hynrei, ka jingkylli halor ka jingmut bad jinglah kala wan bad ka Airpot Authority of India (AAI) kam shym la pyni satia ia ka jingkwah (ia kane ka jingtyrwa)…kumta, ngi la poi ha u pud ba to ngin sdang shuwa da ka liengsuin ba 19-20 seat hynrei ngi dang don beit ia kane ka jingthmu.
Shuwa kane haba jubab ia ka jingkylli ba wanrah da u MLA ka TMC Rupa Marak, ula pynpaw ia ka jingsngewkhia halor ka jingpynslem ban pyntreikam ia ka Baljek Airport wat hadien 17 sem, u Symbud Myntri Rangbah ba khmih ia ka tnad Transport Bah Sniawbhalang Dhar ula ong “Ka Baljek Airport ia mynta kam pat treikam satia. Ka Sorkar ka dang iakre bad ka AAI ban pyntreikam noh ia kane ka Kadliengsion da ki liengsuin ba 19-20 seat”.
Ula pyntip ba ka jaka bah eh 211.13 acre kala don na ka bynta ban pynroi bad pynheh ia ka Airport. 153.13 acre la dep ban thied hapdeng u snem 1986-1989. La pynlut ruh haduh T. 3,57,97,775 ban thied jaka haduh mynta na ka bynta ban pyntrei ia ki jingdonkam baroh ha kane ka Airport.
Ha kajuh ka por, u bah Sniawbha ula pyntip ba ka Sorkar kala pdiang ia ka jingtyrwa ban thied shuh shuh ia ka jaka ba 68 acre. “Ngi dang ap ia ka jingiajurip lang bad ka AAI hashuwa ban thied ia kane ka jaka naba 211 acre ka jaka ka dang duna bha” ula ong.
Kat kum ka jingong jong u, ka rai ban thied shuh shuh ia ka jaka kala mih hadien ba ka AAI kala pynpaw ia ka jingbym mynjur ban pynher ia ki liengsuin ba rit na kane ka kad.
