Shillong, Lber 04 : U Myntri Rangbah ka Jylla Conrad K Sangma ha ka sngi Ba-ar ula kular ba ka Sorkar jong u kan wad ia ki lad ki lad ban pynbeit noh ia ka jingiakajia pud ha ki hynriew tylli ki jaka ba dang sah bad ka Assam ban pynthikna ia ka jingsuk ba neh shirta.
“Ngin sa wad ia ki lad ki lynti ban pynbeit bad pynthikna ia ka jingsuk ba neh shirta. Mynta, ngi la dei iasoi ia ka Memorandum of Understanding (MoU) bad pynbeit ia ki hynriew tylli ki jaka ba iakajia” ong u Conrad ha ka jubab ia ka motion bala wanrah da u MLA ka UDP na Nongpoh Bah Mayralborn Syiem ha Iingdorbar.
Haba pynpaw ba kane ka kam ka dei kaba jyrwit jyrwat bha, u Myntri Rangbah ula ong ba bun ki Sorkar ha ki snem bala leit kim ju kwah ban iakren ia ka kam khappud hynrei dei tang ka Sorkar Meghalaya Democratic Alliance (MDA) kaba la shim ia ka sienjan ba tyngeh ban ong “To ngin iakren bad wad ia ka lynti ban jam shakhmat”.
Haba pyntip ba ka Sorkar kala dep pynbeit ia ka Tarabari sector (kawei na ki hynriew tylli ki jaka ba iakajia) haba pynshong nongrim ia ka jingkwah u paidbah. Ka Sorkar Assam kala kynran dien hadien ba ki Shnong jong kane ka thain kila wan sha Meghalaya.
“Ta ka daw ba ym don nonghikai satia ha ki skul ha kum kine ki shnong. Ngi la shim ia katto katne ki sienjam bad ngin sa shim shuh shuh ban leh eiei halor kane ka kam” ong u Myntri Rangbah.
U Myntri Rangbah ula kular ruh ba ka Sorkar kan sa shim ia ka sienjam ban pynthikna ia ki jingtei ba donkam kum ka jingpyniasoh surok bad kiwei kiwei ki jingshakri ban ai sha ki paidbah kiba sah ha ki jaka bala dep ban iapynbeit pud.
Halor ka jingkynnoh ba pyndonkam ka Assam da ka bor, u Myntri Rangbah ula ong ba kane ka dei ka jinglong jingman kaba tasam bha. “Ha kine ki 53 snem kum kine ki jingjia kila iai jia na ka por sha ka por. Haba ong ia kane, kaei kaba kongsan ban shimkhia ka long ka lynti kaba ngi hap ban jam shakhmat bad kaba ngim pat ju iohi ha ki snem bala leit”.
“Kine ki dei ki jingeh kiba tasam bha hynrei ka dei tang ka jingiakren ba ngin lap ia ka lynti ban pynbeit” ula ong haba pynpaw ia ka jingsngewkhia halor ki jingjia ba sngewsih kiba jia ha ki jaka khappud.
Ula kyntu ruh ia ki dkhot ka Iing ba kim dei ban sngew artatien ha ka ban pyntip sha u lada mih kano kano ka jingjia ha khappud bad ong “Phi don ia ka direct hotline bad nga. Lada mih kano kano ka jing jia ha ka constituency jong phi, ngan dei u briew ba nyngkong ban pynthikna ban gin lahban iada ia ki briew jong ngi ha khappud”.
Ha kajuh ka por, u Conrad ula kyntu ia ki dkhot ka Iing ba kin pyntip sha u lada don kano kano ka jing pynslem ban shna ia ki Border Police Outpost, ka ban pynkhlain ia ka jingdon ki pulit ha ki jaka khappud.
Halor ka jingregister jaka, u Conrad ula ong ba ka Sorkar kala shimkhia bad shong bishar ia kane ka kam ha ka lynti kaba dei.
