Shillong, Naiwieng 18 : U Myntri Rangbah ka Jylla Conrad K Sangma ula ong ba ka kam pule dangle ka dei ka kam kaba la pynbeit jingmut bha da ka Sorkar Jylla.
“Watla ka dei ka kam kaba bun ki jingeh hynrei ngi la pyrshang ban leh eiei ha kaban wanrah ia ki jing kylla ha kane ka kam da kaba pynbeit ryntih bad shim ia ki sienjam ki ban pynmyntoi ym tang ia ki khynnah pule hynrei ia ki nonghikai bad ki kynhun ba iadon bynta ha ka kam” ong u Conrad haba plie ia ka Iingskul ka Mount Hermon English School ha Mebitpara, kaba don hajan ka Dalu.
Ia kane ka Iingskul la tei na ka jingiarap song pisa hapoh ka Chief Minister’s Special Development Fund (CMSDF)-NGO category, bala mang ha u snem 2024-25, kaba long haduh T. 5,96,000 lyngba ka Dalu C&RD Block.
U Conrad ula pynpaw ba ka long ka sngi ba kyrpang namar ka dei ka sien ba nyngkong ba ka kyrteng jong u bad ka kurim kaba dei ka MLA ka thain, kila paw kyrteng lang ha u mawthoh kyrteng.
“Nga tharai kane ka dei ka khyllipmat kaban sah jingkynmaw, kaba pynlong kyrpang shuh shuh ia kane ka jingialang” ula ong.
Ula ong ruh ba kane ka prokram ka dei ka sienjam ba sdang ha kaban pyndep ia ki jingkular jong ka MLA ban wanrah ia ki kam pynroi ha ka thain.
Haba ai jingkren, ka Kurim u CM bad MLA ka Gambegre Mehtab Chandee A Sangma kala ai khublei ia ki paidbah jong ka Shnong ia ka jingai jingkyrshan jong ki ia ka bad ong “Watla kane ka dei ka sien iakynduh ba nyngkong bad phi, nga tip pat ia ki jingdonkam bad ki jingeh jong ka Shnong bad ngan ialeh katba lah ban leh eiei ia ki” kala ong.
