Shillong, Nailur 19: Ki Pulit ka Jylla kila ioh ban kurup ia ki droks bad ki dawai pynbuaid ba shongdor haduh T. 223 klur hapdeng u snem 2019 haduh ka 6 tarik Nailur, 2023, pyntip u Symbud Myntri Rangbah ka Jylla ba khmih ia ka kam Pohiing (Police) Bah Prestone Tynsong ha Iingdorbar Thaw Ain ka Jylla.
“Kane ka dei ka jingjop kaba khraw ia ki Pulit ka Meghalaya” ong u Bah Tynsong haba jubab ia ka zero hour notice bala wanrah da u MLA ka UDP na Nongpoh Bah Mayralborn Syiem.
“Ka jingkynrei u jingkhaii droks bad jingdih drok ha Jylla kam dei kaba la khein sting bad ngi la buh hakhmat eh kum kawei na ki kam pynjot ia ka imlang sahlang kaba donkam ban ratdyngkhong bad leh da kaba tyngeh kat kum ki kyndon jong ka ain”ula ong.
Khnang ban lah tehlakam ia kane ka jingeh kat kum ki ain kiba ladon lypa, u Bah Tynsong ula ong ba ka Sorkar ba mynta kala pynbna ia ka Advisory Board ha ka 30 tarik Jylliew, 2023 , ka ban khmih beit thih tang ia ki kam ban set ia ki nongkhaii droks kiba ju mlien ha ka kam.
Ia kane ka Board la thaw kat kum ka kyndon 9 jong ka Prevention of Illicit Trafficking in Narcotic Drugs and Psychotropic Substances Act, 1988 (PITS-NDPS) bad naduh mynta, ka jingset ia ki nongkhaii droks kan long kat kum ki kyndon jong kane ka Ain.
U pyntip ba ka Tnad Pulit kala dep phah ia ka jingtyrwa ban sdang ia ka jingpynngat ia 9 ngut ki nongkhaii droks kat kum ki kyndon ka PIT-NDPS Act, 1988.
Khnang ban lah pyntreikam ia ki kyndon jong ka PIT-NDPS Act, 1988, ka Tnad Pulit kala nang pynkhlain ruh ia ki buit trei kam ban tehlakam ia ka jingkhaii droks bad jingdih droks hapoh ka Jylla.
Nalor kane, u Symbud Myntri Rangbah ula pyntip ba naduh u snem 2019 haduh ka 6 tarik Nailur 2023, ki Pulit kila register case haduh 515 tylli ha kaba 826 ngut ki dei ki shynrang bad 109 ngut ki dei ki kynthei kiba la shah kem.
Hapdeng kane ka juh ka por, haduh 32555 gram u heroin, 8479 kilogram u cannabis, 2796 gram u opium, 81 kilogram u crystal meth, 57,802 bitor ka codeine cough syrop bad 15,396 kiwei pat ki jingdih, la ioh ban kurup da ka Tnad Pulit.
Nalor kine ki mar, ki Pulit kila ioh kurup ruh haduh 287 tylli ki kali, 881 tylli ki mobile phone bad 6 tylli ki tiar siat.
 Bah Prestone Tynsong ha Iingdorbar Thaw Ain ka Jylla.){kind=link}