Guwahati, Nohprah 14 :Ki pulit ka nongbah Guwahati kila ioh ban kurup shibun bah u drok uba shongdor haduh kumba T. 14 klur bad kem noh ia uwei u briew uba donkti ha ka jingkhynra kaba la long ha ka miet 13 tarik mynta u bnai.
Ia une u briew uba la shah kem la tip kyrteng kum u Mirajaul Islam.Hadien ba la ioh ia ka jingtip kaba bniah, ka kynhun ki pulit na Guwahati hapoh ka jingialam jong u Joint Commissioner of Police, u Partha Sarathi Mahanta bad u ADCP u Kalyan Pathak kila pynlong ia kane ka jingleit khynra.
Ha kane ka jingkhynra ki bor pulit kila ioh ban kurup haduh 50,000 tylli ki Yaba tablets bad 200 grams u Heroin napoh kawei ka kali ambulance.
“Ka ambulance kaba don ia u registration number MN-03C-0037 ka la wan napoh Manipur hadien ba kala shah bat noh ha kaba la ioh ruh ban kurup haduh 50,000 Yaba tablets nalor 200 grams u drok heroin na kane ka ambulance,” ong u Mahanta.
Dang ha kine ki khyndiat sngi ba la dep ki pulit ka Assam kila ioh ban kurup ia u drok uba shongdor haduh T. 50 klur bad ioh ruh ban kem noh ia san ngut ki briew kiba donkti napoh Cachar district ka Assam.
Katkum ki khubor, la ong ba ki pulit hadien ba kila ioh ia ka jingtip kaba thikna kila pynap shrip bad ioh bat noh ia ki artylli ki kali kiba wan na Aizawl sha Silchar ha ka 10 tarik mynta u bnai ha kaba kila ioh ban kurup ia utei u drok ba kitei ki kali.
Ha kane ka jingpynap shrip ki pulit kila ioh ban kurup haduh ar lak tylli ki Yaba tablets kiba la wan napoh Myanmar lyngba ka Mizoram, bad ka dor jong une u drok hapoh ki jaka iew beain ka pyrthei ka long haduh kumba T.50 klur.
