Shillong, Nailur 30: Ki pulit ka nongbah Shillong, ha ka miet jong ka Sngi u Blei, kila ioh ban kurup ia ki tiar tuh ha kaba iadei bad ka case kaba la rejistar Case hapoh ka Rynjah Police Station.
Ia kitei ki tiar tuh la lap na Saw Furlong bad ki pulit jong ka Nongmensong Outpost kila leit mardor sha katei ka jaka ba don kitei ki tiar tuh.
Ha ka jingtohkit , ki Pilit kila lap ia kawei ka trok 6 shaka (AS01CC 3985) kaba la thep lang bad ki mar jot mar pei kiba dei ki tiartuh, iathuh u Superintendent of Police ka East Khasi Hills u Bah Sylvester Nongtnger ha ka kyrwoh khubor.
Ki tiar kiba la ioh ban kurup ki kynthup 10 unit ki Beam Web Assembly, 32 Unit ki Shuttering Jack, 1 ka mobile phone bad ka sim card.
Nalor kane, la kurup ruh iaka taksi kamai (ML 05K 7554) ha kaba iadei bad katei ka jingjia.
U SP ula pyntip ba ha kawei pat ka bynta, la lap ksai ha kaba iadei bad kawei pat ka case jong ka Sadar Police Station, lyngba ka jingioh kurup ia ka kali na Imphal, Manipur.
Katei ka jingjia kala mih lyngba ka jingujor ejahar pyrshah ia u Mohammad Fareed, uba shong ha Barapathar Mawbah, Shillong ha kaba u nongujor ula kynnoh ba u Fareed ula pynbor iau ban long u ‘Guarantor’ ne Nongbahkhlieh haka jingthied ia ka kali Maruti Suzuki Eeco 5 STR, khlem da pynpaw ba ia katei ka kali ynshim ha ka kyrteng jong utei u nongujor kaba la pynlong ia u ban hap ban siew ia ka jingshim ram.
Lyngba ka jingtohkit kaba khlem shongthait, la lapksai ia katei ka kali bad la wanrah noh biang ia ka sha nongbah Shillong.
Ka jingtohkit halor kitei ki ar tylli ki jingjia ka dang iaid shakhmat ban khmih bniah ia ki jingshisha bad iaka jinglong jingman baroh, la ong u SP.
