Nongpoh, Rymphang 04 : Ki Pulit ka Ri-Bhoi District, kila ioh ban kurup haduh T. 2,48,500 ka pisa thok na ki laingut ki briew kiba thmu ban pyniaid iew ia kine ki pisa hapoh Nongbah Shillong.
Ia kine ki briew la ioh ban kem na Lad Umsning hadien ka jingpynap shrip kat kum ka khubor ba ioh lum ba kin don ki briew ki ban wan bujli ia ki pisa thok hapdeng arliang mamla.
Ia kane ka jingtip la ioh ha ka por 4:30 baje janmiet bad ki Pulit ka Ri-Bhoi hapoh ka jingialam u Addl SP Bah B Diengngan, MPS lem bad u OC ka Umsning kila pynieng ia ka jaka talasi kali ha lad Umsning.
U Superintendent of Police ka Ri-Bhoi u pyntip ba dei ha ka por 7.25 janmiet, ki Pulit kila ioh ban bat ia kawei ka taxi ba shong da kawei ka kynthei ba kyrteng ka Chonglasang Simte ba na Lumpyngngad, East Khasi Hills bad kawei ka Scooty NO AS01-BB-0939 bala niah da u Jono Boro ba na Sundarpur, Assam lem bad kawei ka Kynthei ka Lalnunthuangi ban a Durtlang, Aizawl.
U iathuh ba ha ka jingtalasi ia ka pisa jong ka Lalnuntluangi, ki Pulit kila ioh ban kurup haduh 5 song ka pisa thok ba kot T2,48,500 na kawei ka song plastic. Ki Pulit kila ioh ban kurup haduh 4 tylli ki mobile phone, 3 tylli ki ATM card bad ka scooty.
Halor kane, ki Pulit kila register case pyrshah ia kine ki briew kat kum ki kyndon ain. Ka jingtohkit mynta kala iaid shakhmat.
