Shillong, Lber 04: Ki Pulit ka Ri-Bhoi District ha ka miet sngi U Blei, kila ioh kurup haduh 5000 kilo u ganja uba shongdor kumba T.20 klur.
U Superintendent of Police ka District Jagpal Singh Dhanoa ha ka sngi Nyngkong, ula pyntip ba kane ka jingioh kurup ka dei kaba la jia ha ka jingtalasi kali jong ki Pulit ka Ri-Bhoi DEF bad ka E/16 Battalion jong ki CRPF ha Lad Umsaw, hadien ka jingioh ia ka khubor ba thikna ia ka jingwan ka trok NL01-AH-5853 ba kit ia une u jingdih buaid.
Kane ka jingtalasi kali ka dei ruh halor ka jingpynkhlain ia ki bor pahara namar ka jingnang jan jong ka elekshon MP Lok Sabha.
Ha kane ka miet, ki Pulit kila bat ia kane ka trok bad kila kem ruh ia uwei u briew uba suba donkti.
“Hadien ba pyndep ia baroh ki jingdonkam kat kum ki kyndon ka NDPS Act bad ha ka jingdonlang ki nongsakhi shimet, la khynra ia ka kali bad lap haduh 280 song u ganja” ula iathuh haba bynrap ban a ka jingle test ia une u jingdih la pynshisha ba dei u ganja uba khia haduh 4746.409 kilo.
Ki Pulit kila ioh kurup ruh ia ka pisa ba T. 3,760 na u nongniah jong kane ka trok u Babulal Sheikh, ia uba la kem da ki Pulit.
Halor kane ka jingjia, ki Pulit kila register case ia une u briew hapoh ki kyndon ka NDPS Act hapoh ka Umiam Police Station bad ka jingtohkit mynta kala iaid shakhmat ban tip shano ba thmu pynpoi ia une u jingdih bad nangno ba wanrah ia u.
