Shillong, Nohprah 30: Haka jingiai bteng ban pyrkhing ïa ka jingkhaïi drok, ki pulit ka Jylla Assam ki la kem ïa 2 ngut ki briew bad kurup ruh ïa ki drok kiba bun bha kiba kynthup ïa u heroin, ki dawai yaba Tablets bad ki dawai Tramadol kiba wan na ka jylla Meghalaya.
Ia kane ka jingkem bad kurup la leh ha ki ar tylli ki jingkhynra kata ha South Salmara- Mankachar district.
Hadien bala ioh jingtip ba ka jingkhaïi be-aiñ ïa u drok Heroin ka dang ïaid ha ka thaiñ Jordanga Part-2, la sdang ïa ka jingkhynra da ka kynhun kaba hap hapoh ka jingpeit jong u Addl. SP Hq SSM bad la ialam da u OC Mankachar PS, u SI Sonu Dev Barman, u SI Nayan Jyoti Gogoi bad ki Pulit ka Mankachar PS.
Ha kane ka jingkhynra la ioh kem ia u Nur Amin uba 42 snem ka rta na Mankachar bad kurup ia u drok ba khia 13 gram ba la thep ha kawei ka jingsop sabon rong Maroon bad kawei ka phone.
Ki pulit ki la iathuh ba u Amin u la shah kem katba u dang pyrshang ban die ia u drok bad katba u dang pyrshang ban phet na ki pulit.
Ki Pulit kila rah ia u ha ban tohkit bniah ha kaba iadei bad katei ka kam.
Ki pulit ki la kdew ruh ba ia ka rukom kurup bad ka jingkem la leh ha ryngkat ka jingring dur (videography) ha ka jingdon lang ki sakhi ba laitluid.
Ka jingujor FIR bad ki jingpynkhreh ain ruh ki dang iaid shakhmat.
Ha ka jingkhynra kaba ar, la pynlong da ka kynhun ba la ialam da u Addl. U SP (Hq) South Salmara-Mankachar ryngkat u SI Jayanta Rajkhowa, u SI Kaushik Dutta bad ki Pulit ka South Salmara PS ha ka thaiñ Boro Sadamari.
Ha katei ka jingkhynra, la ioh ban kem ia u Abdul Motleb Bepari (27 snem) uba na South Salmara bad la ioh ban kurup shibun bah ki dawai pynbuaid na iing jong u.
La ioh kurup 56 tylli ki dawai Yaba Tablets kiba khia 6 gram, 1680 tylli ki Tramadol Capsules Brand name SPSPHEN+ ba la thep ha ki 70 strip kawei ka strip kaba don 24 tylli ki capsules, kiba khia 1454 gram bad kawei ka phone.
Ki pulit ki la iathuh ba u Abdul u la shah kem ha ka por ba u dang pyrshang ban die ia ki dawai bad ba ka iing jong u ruh ka dei ka jaka bam ia ki dawai.
Ki pulit ki la iathuh ba ka jingtohkit kaba nyngkong ka pyni ba ia kitei ki tablet la wanrah na ka Jylla ba marjan jong ka Meghalaya.
La rah ia u Abdul ban tohkit bniah ha kaba iadei bad katei ka kam bad ka jingujor FIR bad ki jingpynkhreh ain ruh ki dang iaid shakhmat.
Ki pulit ki la bynrap ba ia ka rukom kurup bad kem la leh ha ryngkat ka jingring dur (Videography) ha ka jingdon lang ki sakhi ba laitluid.
