Shillong, Risaw 23 : Ki shipai BSF ka Meghalaya Frontier, kila pynpulom ia ka kam khaii tuh na Khappud sha Bangladesh bad ioh kurup ia bun tylli ki masi bad ki jingtah pynbhabriew kiba shongdor palat T.16 lak.
Ki shipai BSF ka 4th Battalion kila pynlong ia ka jingkhynra ha khappud ka Muktapur bad ioh kurup haduh 27 tylli ki masi kiba la buhrieh ha kawei ka khlaw ba marjan ka khappud. Kine ki masi ki dei kiba thmu ban khaii tuh sha Bangladesh.
Kumjuh ruh ki shipai ka 193 Bn kila ioh ban bat ia kawei ka pick-up ba kit ia ki tiar tah pynbhabriew na khappud ka East Khasi Hills District nalor ki mar bam bad ka kyiad.
Ia kine ki mar ba kurup la aiti noh sha ki Pulit bad custom ba kin leh ia kaba donkam.
