Shillong Kyllalyngkot 04: Ka BSF Meghalaya Frontier kaba pahara ha khappud kaba 444 Km bad ka ri Bangladesh, tang ha u snem 2023, kala ioh ban kurup ia ki mar khaii tuh ba shongdor haduh T.49.20 Klur bad ioh kem ia 180 ngut kiba donkti ha kitei ki kam beain.
Katkum ka kyrwoh, ki shipai BSF ki pyntip bi shipai ki hap ban pahara ha ki thain kiba bun ki riat, ki jaka ki bympat ker sainar, ka lynti iaid ki hati bad ka jingther u lapbah, hynrei ha u snem 2023 kila ioh ban kurup ia ki mar khaii beaiñ kiba shongdor T.49.20 Klur kiba kynthup ia ki masi, shini, ka pisa thok bad kiwei kiwei ki mar ki mata.
Dang ha ka 3 tarik Kyllalyngkot 2024, ki shipai BSF kila ioh ban kurup haduh 10,000 kilo ka shini ba thmu ban khaii tuh sha Bangladesh bad ia kane ka mar la ioh ban kurup na kawei ka kali najan Sonapur, East Jaintia Hills.
Nalor kane, kala ioh ruh ban kem ia ki 180 ngut ki briew kiba donkti ha ki kam beain kiba kynthup ia 113 ngut ki nong India, 67 ngut ki nong Bangladesh bad 2 ngut ki Rohingya kiba la pynkhein ia ki kyndon aiñ ha kappud.
Ki BSF kila pyntip ruh ba nalor ka jingtehlakam ia ki kam sniew, kila pynlong ruh ia ki prokram kiba ai jingiarap ia ki paidbah ha khappud kum shi bynta ban wanrah ia ka jingiadei kaba jan bad ki nongshong shnong.
Ha u snem 2023, ka BSF Meghalaya kala pynlong 45 tylli ki program kaba kynthup 24 tylli ki medical camps ha kaba la ai jingsumar ei bad ai dawai dashin ei ia ki paidbah bad la sam ruh ia ki tiar ki tiar sha ki paidbah kiba wan na ki longiing baduk.
Ka Meghalaya FTR HQ BSF kala pynlong ruh ia ka BSF Inter Frontier Judo, Gymnastics bad Taekwondo Championship ha NEHU, Shillong bad kala pynlong ruh ia ka ‘Meri Mati Mera Desh’ Campaign ha ki thaiñ khappud bad ka ri Bangladesh da kaba iatreilang bad ki bor sorkar.
Ka BSF kala pynlong ruh iaka Blood Donation Camp, ban ai iaka jingiarap kaba mardor bad ban iashimbynta ha kaban ai kano kano ka jingiarap haba don kino kino ki jingjia ne jingwan lynshop.
Ka BSF Meghalaya ka iengskhem ha kaban ai jingiada ia ki nongshong shnong ha ki thaiñ khappud bad khamtam ban pynneh ia ka shongsuk shongshngain ha khappud bad ka ri Bangladesh.
