Shilong, Nailur 10: Ki shipai BSF Meghalaya ryngkat bad ki pulit ka jylla kila pynlong iaka jingkhynra ha ka sngi Saitjaiñ bad ioh kurup ia bun bah ki dawai, ki jaiñ, ki ïitkhmat kiba shongdor baroh lang haduh T.88 lak.
Kine ki mar ki dei kiba thmu ban khaïï be-aiñ sha ri Bangladesh lyngba ki thaiñ khappud kiba don ha South West Khasi Hills.
Hadien ba la ioh ia ki jingtip kiba thikna, ki BSF bad ki pulit kila bat ia ki ar tylli ki kali Bolero Pickup hajan ka Gumaghat kaba don ha khappud bad kitei ki kali kila kit ia ki dawai, jaiñ saree bad ki ïitkhmat ban khaïï sha Bangladesh.
La kem ia baroh ar ngut ki nongniah jong kitei ki kali namar ba kim shym la lah ban pynshisha ne ban pyni ia ki kot ki sla ha kaba iadei bad kitei ki mar ki mata kiba ki rah.
Ia kitei kiba la shah kem ryngkat bad ki mar kiba la ioh kurup la aiti noh sha ki pulit ba kin leh ia kaba donkam.
Ha kawei pat ka jingkhynra, ki BSF bad ki pulit kila ioh kurup ia u 9000 Kg u kwai tyrkhong uba shongdor T.18 lak bad ia kitei ki kwai tyrkhong la buh ha kawei ka ïingkynjah kaba don hajan ka shnong Rongra, South Garo Hills.
