Shillong, Nohprah 07 : Ka Sorkar Jylla kala kurup (frozen) ia ka Bank Account jong u Heh Pulit ba shah kem Bah GK Iangrai hadien ba ula shah kynnoh donkti ha ka jingbamklop ia ka pisa ba la mang ban tei ia ka NERS PSAP ha Sadar Police Station Complex.
Ia kane la pyndep hakhmat ka Iingkashari Meghalaya High Court haba shong bishar ia ka PIL halor kane ka kam.
Ka Sorkar Jylla kala pyntip ba une u briew (GK Iangrai) u don mynta hapoh ka Judicial Custody bad la ai jingbit ruh ban ujor sa artylli ki jingujor pyrshah ia une u juh u briew.
Ka Sorkar kala pyntip ruh ia ka Iingkashari ba ka Bank Account jong une u briew la dep ban kurup bad la buh ruh ia ka jingkyrpad kat kumka kyndon 105 jong ka Criminal Procedure Code hakhmat jong u Session Judge.
Ka Iingkashari kala buh ban shong bishar biang ia kane ka kam ha ka 9 tarik Lber 2023.
Ha ka 2 tarik Naiwieng, ki Pulit CID kila kem ia une u Bah GK Iangrai uba bat ia ka kyrdan Commandant ka SF-10 Battalion halor ka jingkynnoh donkti ha ka jingbam klop ia ka pisa bala mang ban tei ia ka NERS-PSAP ha Sadar Police Station.
