Kurup ka Enforcement Directorate ia ki nongkynti ba jan kot T.50 klur ka CMJ University

Shillong, Naitung 17 : ka Enforcement Directorate (ED) kala kurup ia ki nongkynti ba jan kot T.50 klur jong ka Chandra Mohan Jha (CMJ) University kaba shah tohkit halor ka jingai PH.D degree thok, halor ka jingkynnoh ba ka buhrieh ia ka pisa ba shu kamai tuh bad kynshew sha ki bank ba shabar ka Ri.

“Ka ED, Guwahati kala kurup ia baroh ki nongkynti (ki iing bad kali) ba shongdor haduh T.7.56 klur jong ka CMJ University, Shillong” pynbna ka EC dang shen ha ka X (Twitter mynshuwa).

Ka ED kala pyntip ba haduh mynta, ki nongkynti jong u Chandra Mohan Jha bad ki bahaiing hasem kynthup naduh ki kali, ki ksiar ki ksah bad ki iing ki sem ba shongdor haduh T. 48 klur la dep ban kurup. Ia kane ka jingkurup la leh kat kum ki kyndon jong ka Prevention of Money Laundering Act, 2002.

Shiphew snem mynshuwa, kane ka University kala shah kynnoh ba ka ai Ph.D Degree thok bad ka Sorkar Jylla kala hukum ban khang dam ia kane ka University.

Ka Sorkar kala mudui ia ka ejahar kam bymman pyrshah ia ki bor pyniaid jongka University bad ia kane ka case la khlieh da ka Tnad CID jong ka Jylla. U Nongseng bad Chancellor ka University, Chandra Mohan Jha, uba jer kyrteng ia ka University ha ka kyrteng lajong, ula phet krad bad jah rngai.

Ka Campus jong ka University ha Laitumkhrah kala shah khang dam bad ha ka jingkhynra, ka tnad CID ka la ioh ban kurup da ki hajar tylli ki copy jong ki thesis.

Ka kynhun tohkit kala kurup ia palat 4000 tylli ki copy jong ki theses ki samla pule na kylleng ki Jylla ka Ri bad nabar ri kumjuh. Hadien kane, sa 6000 tylli ki theses la ioh ban kurup na ka campus kaba don ha Jorabat.

Ka kynhun tohkit ka kynnoh ba kine ki theses ki dei kiba la shon da ka University na ka bynta ki samla pule bad ia ki degree la ai da ka jingsiew dor. Kila khein ruh ba kane ka kam jong ka University ban die ia ki degree kala kot ia palat T.100 klur.

Khatduh ia u Chandra Mohan Jha la ioh ban kem na Bihar hadien ka jingthep kyrteng ban iakhun ia ka elekshon Lok 2014 kum u kyrtong shimet na ka Jhanjharpur Constituency. Ula shah kem na Railway Station hadien ba u dep ai jingkren ha ka jingialang elekshon bad mar mar hi la wan ialam noh ia u sha Shillong da ka jingai jingbit ka Iingkashari.

U Lat ka Jylla ha katei ka por, u RS Mooshahary, uba dei ruh u Visitor ka University, ula lap nyngkong eh ia ka jingpynkhein ain jong kane ka University. Da kane ka jingshem, kala don ka jingtohkit bad sei madan shuh shuh ia kane ka jyrsieh. Kane ka kam kala poi shaduh sha Iingkashari Supreme Court.

U Lat ka Jylla ula hukum ruh ba ia ki degree bala ai da kane ka University dei ban khein iap lut. Naduh u snem 2010 hadien ba la seng ia kane ka University kat kumka State Act, haduh 3379 ngut ki samla pule kila ioh ia ki degree n aka CMJ University.