Shillong, Nailur 24 : Ka Tnad Custom kala ioh ban kem ia 3 ngut ki nongkhaii ksiar hynnin ka step na Nongbah Shillong bad ioh kurup ia ki biskit ksiar bar Ri kiba shongdor haduh T. 1 klur.
Halor ki jingtip ba thikna ba ka don ka jingkhaii ia ki biskit ksiar bar ri lyngba ka khappud India-Bangladesh na Meghalaya lyngba kawei ka kali na Guwahati, ki Ophisar ka Ophis u Commissioner of Custom Preventive (CCP), Shillong, kila ioh bat ia kawei ka Mahindra XUV 500 hynnin ka step 23 tarik Nailur na Jhalupara, Shillong.
Ha kane ka kali u don uwei u briew uba shong ha Rangia, Assam watla u dei uba na West Bengal.
Ha ka jingtohkit, une u briew ula phla ba kane ka ksiar bar pynpoi na Bangladesh ka dang don bad u bad kumta hi, ki Ophisar ka Custom kila khynra ban ioh kurup haduh 14 tylli ki ksiar biskot bala song ha ki artylli ki bek plastic.
Kine ki ksiar ki khia haduh 1632.450 gram bad ki shongdor haduh T. 1,01,78,326, ong ka kyrwoh na ka CCP.
La pyntip ba hadien kane, kila ioh jingtip pat ia uwei u middleman uba aiti ia 7 tylli ki biskit ksiar bad ha ka jingbuddien wut wut, ki Ophisar ka CCP kila ioh bat ia une u briew na Jhalupara.
Une u briew ula phla ba ula leit shim ia kine ki ksiar na kawei ka Kynthei ha ka dukan kaba don ha Iewduh, Shillong.
Ha ka jingtohkit bniah ia kane ka dukan, la ioh pat ban kurup ia ka pisa ba T. 9.5 lak kaba dei ka pisa ba thied ia kane ka ksiar. Ia kane ka pisa ruh la kurup noh da ka Custom.
Ha ka jingtohkit ia kane ka Kynthei, la shem ba ia kane ka ksiar la wan pynpoi tuh na khappud ka Indo-Bangladesh.
Lai ngut ki briew kila shah kem bad ka jingtohkit mynta ka dang iaid shakhmat, ong ka CPP.
Lah ban kdew ba ha kawei pat ka case jong u bnai bala lah, ki Ophisar ka CCP, Shillong kila ioh kurup ia 5 tylli ki biskit ksiar ba khia 582.70 gram, na uwei u briew hajan Jorabat. Ia une u briew la ioh bat ha kawei ka Maruti Car.
Ia kane ka ksiar la wan pynpoi na Bholaganj ka don ha khappud Indo-Bangla. Ha ka jingbuddien mar mar ha ka Iing ha Lumpariang, kaba dei ka jaka ba leit shim ia kane ka ksiar, la lam pat sah ka jingioh kurup ia ka pisa India ba T. 3.96 klur ia kaba la ngeit ba ka dei ka pisa ba die ia ka ksiar.
Ka jingtohkit ia kane ka jingjia ruh ka dang iaid shakhmat.
Ha kajuh ka por, ka CCP ka ong ba ka Tnad Custom ka dang kut jingmut ban iakhun pyrshah ia baroh ki kam bymman ba ryngkang khappud kynthup ka jingkhaii droks, cigarette, droks, ki mar jong ki mrad khlaw, ka pisa thok, ki kam thok ha ka khaii ka pateng bad kiwei kiwei.
Ka ong ba mano mano ruh ki lah ban kyrshan ia kane ka jingiakhun pyrshah ia ki kam bymman ba ryngkang khappud haba kular ba ia ki kyrteng jong ki nongai jingtip ym tang ba un buhrieh bha, hynrei kan don ruh ka skhim ai khusnam kaba dei ka jinglait siew ia ka Income Tax.
