Shillong, Naiwieng 25: Ka Tnad Custom kala ioh ban kurup ia u droks ba shongdor haduh T. 2.59 klur bad iohkem ia arngut ki briew na Shillong.
Kat kum ki jingtip ba ioh ba kan don ka jingpynpoi ia u droks ha kawei ka kali na Silchar, ki Ophisar ka CCP Shillong kila ioh bat ia kawei ka Tata Punch Car ha ka janmiet 22 tarik Naiwieng na ka thain Nongmynsong, Shillong.
Ha ka jingtohkit, kine ki briew kila kyntait ia une u droks la wan kit da ma ki, Hynrei da ka jingtalasi bha ia ka kali, ka Custom kala ioh kurup haduh 30 synduk sabon u powder ia uba la pynshisha ba dei u heroin hadien ka jingleh test.
Kat kum ka kyrwoh na ka ophis u Commissioner of Custom Preventive (CCP) “Haduh 370 gram u powder rong pink bala test ba dei u heroin ba shongdor kumba T.2.59 klur , la ioh ban kurup. Arngut ki briew kila shah kem bad ka jingtohkit mynta ka dang iaid shakhmat”.
La ong ba ka Tnad Custom kala trei shitom ban iakhun pyrshah ia baroh ki kam bymman ba wan na shiliang khappud la ka dei ka jingkhaii ksiar, cigarette, droks, mrad khlaw, pisa thok bad kiwei kiwei.
