Guwahati, Naiwieng 11 :Ka jingshah pyniap jong kawei ka khynnah trei kaba dang hapoh rta hapoh Dhula kaba hap hapoh Darrang district ka Assam bad ka jingpyrshang ban buhrieh kala lam sha ka jingshah kem jong ki laingut ki heh pulit, uwei u executive magistrate bad laingut ki doktor halor ka jingkynnoh donkti ha kaba ialam bakla ha kaba iadei bad ka jingtohkit.
Ka jingtohkit halor katei ka kam pyniap, ia kaba kham hashwa la pynkut ba ka dei ka kam pyniap ia lade kala kylla khongpong hadien ba u Myntri Rangbah (CM) ka Assam u Himanta Biswa Sarma ula hukum ia ka tnat pulit ba kan thaw ia ka kynhun jong ki laingut ki dkhot ka Special Investigation Team (SIT) na ka bynta ban pynlong ia ka jingtohkit kaba bniah halor kane ka jingjia.
Na ka liang ka tnat Crime Investigation Department (CID) ka Assam kaba la shimti ia ka jingtohkit hadien ka jingtuklar jong u CM, kala shem ba ki heh pulit, u magistrate bad ki doktor kila pyrshang ban iada ia u briew uba la shah kynnoh donkti ia uba la tip kyrteng kum u Krishna Kamal Baruah, uba dei u dkhot jong ka tnat shipai uba la shah kynnoh donkti ha kaba leh beijot bad pyniap dusmon ia katei ka khynnah trei iing kaba dang 13 snem rta.
Haduh mynta ka tnat CID kala kem noh ia u Rajmohan Roy uba dei u superintendent of police (SP) ka Darrang district, u Rupam Phukan, Additional Superintendent of Police (ASP) ka Darrang, u Sub-Inspector u Utpal Bora uba dei u Officer-in-Charge jong ka Dhula police station, u Ashirbad Hazarika, Executive Magistrate jong ka Dalgaon Revenue Circle lem bad ia laingut ki doktor jong ka Mangaldai Civil Hospital kiba kynthup ia u Arun Chandra Deka, ka Ajanta Bordoloi bad u Anupam Sharma.Baroh kitei ki laingut ki heh pulit kila shah sospon noh kham hashwa.U Roy bad u Hazarika kila wan ban pyndem noh ia lade ha ka ophis jong ka tnat CID ha Guwahati ha ka 10 tarik mynta u bnai katba kiwei pat kila shah kem noh kham hashwa.
Katei ka lanot kaba dang khynnah kaba trei kum ka nongiarap la shem ha u tyllai phasi hapoh ka iingsah jong u nongai kam jong ka u Baruah ha u bnai Jylliew ba la dep. U Baruah uba la shah kynnoh donkti ula shah kem noh ha ki pulit naduh kham hashwa, hynrei na ka liang kiba haiing jong ka lanot kila kynnoh ba ki bor pulit kim don ia ka mon ban pynlong ia ka jingtohkit kaba bniah halor kane ka jingjia.Nalor kata kila kynnoh ruh ba u OC Bora ula banbor pynban ia ki ba kim dei ban ujor halor katei ka jingiap.Katkum ka case ba la rejistar hapoh Dhula police station ki pulit bad utei uba la shah kynnoh donkti kila kam ba kane ka khynnah kala pynkut hi iala ka jingim da kaba phasi ia lade bad ia ka met jong ka la tip noh hadien ba la pyndep ia ka post mortem.
Hynrei hadien ka jingiai kynnoh da kiba haiing hasem bad ka jingsdang ban mih ki jingiakhih paidbah ha ki bynta bapher bapher ka jylla, na ka liang u CM Sarma ha ryngkat u DGP haskarjyoti Mahanta kila pynlong ka jingleit jurip ia ka iingsah jong katei ka lanot ha u bnai Nailar ba la dep bad hukum ban aiti ia kane ka case ha ka jingtohkit da ka SIT.Kumjuh hadien la aiti noh ia ka jingtohkit sha ka tnat CID ha ka 12 tarik u Nailar ba la dep.
Ka jingtohkit kala lap halor ki kam lehbor, pyniap bad pynduh pyndam ia ki sakhi satar. Ka tnat CID kala leit bad sei biang ia ka metiap jong ka lanot bad pynlong ia ka postmortem kaba ar ha ryngkat ka jingiatreilang bad ka kynhun ki stad forensic bad ki riew shemphang ka tnat ka koit ka khiah bad pynlong ruh ia ka DNA test na ka bynta utei uba la shah kynnoh donkti ha kaba la shem ba ka jingmih kaba khah ha ki jain jong katei ka khynnah ka iadei.
Nalor kata ka CID kala shem ruh ba ki pulit kim shym la ring ia kino kino ki video bad ia ki dien shynriah kti ne fingerprints ha ka por ba la shimti ia ka metiap.Ha kawei pat ka liang na ka liang u Executive Magistrate u Hazarika ruh ula pynbna ba katei ka khynnah kala khlad noh da kaba pynkut hi iala ka jingim khlem da leit jngoh sha katei ka jaka ba la jia.
Katba ka post mortem kaba nyngkong ba la pyndep da kitei ki laingut ki doktor kala pynpaw ba ym don ki dak mong, hynrei ka jingleh ia ka postmortem kaba ar lyngba ka kynhun ba kyrpang kaba kynthup ia ki doktor napoh Gauhati Medical College and Hospital (GMCH), AIIMS bad NEIGRIHMS kala shem ia ki dak mong ha ki bynta jong ka khlieh bad ryndang bad pynkut ba kane ka jingjia ka dei ka jingshah pyniap da kaba ksih ym kaba pyniap ia lade.
Ia ka jingujor kaba bniah la ujor ha ka 25 tarik u Nailur ba la dep pyrshah ia uba la shah kynnoh donkti hakhmat eh u Baruah lem bad ia kiba bun kiwei pat.
Shuh shuh katba ka bank account statement kiba haiing hasem jong utei uba la shah kynnoh donkti, ki jingiaphone, ka leit ka wan bad ka jingpynshong nongrim na baroh ki sakhi satar la shem ba laingut ki heh pulit kila ioh pdiang ia ka pisa na utei uba la shah kynnoh donkti, kata u Bora 5 lak, u Phukan 1.5 lak bad u Ray 2 lak.
