Shillong Nailar 20: Ka Sorkar Jylla kala pynbna ia ka jingthmu ban pyntreikam ia ka Uniform Formula ne ka rukom treikam kaba long kumjuh, na ka bynta ban pynkynriah ia ki nongdie madan bad ki nongshong dukan kiba don ha ka kylleng ki jaka jong ka jylla.
U Symbud Myntri Rangbah ba khmih ia ka kam pynroi sor Bah Sniawbhalang Dhar haba iakren bad ki nongthoh khubor ula ong ba da kajuh ka lynti kaba kila pyndonkam ha Khyndailad yn pyndonkam lang ruh ha kiwei pat ki jaka, ban pynthikna ia ka jingiaid ryntih ha kaba iadei bad ka jingpynkynriah.
“Ngin sa trei ia ka kam. Kajuh ka buit treikam ngin pyndonkam ha baroh ki jaka. Ai ba ka por kan wan bad ngin sa leh bha” ula ong.
Ha Khyndailad, ka sorkar kala sdang ia ka sienjam ha kaban pynkynriah ia ki nongdie madan ban buh ia ka Pedestrian Zone ne ka jaka iaid kjat ban kyntiew ia ka kam jngohkai.
Ki nongdie madan kila ioh ia ka jingiarap da ka song tyngka kaba T.10,000 bad sa mar T.2,000 man la ka bnai na ka bynta 5 bnai.
U Bah Dhar ula banjur ba ka tnad ka dang trei ha ki wat ban shimkhia ia ka mat kaba iadei bad ki nongdie madan ki bym ioh jingithuh kum ha ki jaka ha Laitumkhrah bad kiwei kiwei ki jaka kiba kongsan.
Ka Shillong Municipal Board kala shah bthah ha ka Meghalaya High Court ban aiti ia ka kaiphod halor ka jingdon ki nongdie madan kiba la ioh jingithuh bad ki nongdie madan ki bym pat ioh lisen ha ka thain Laitumkhrah.
Haba kylli u Bah Dhar ula pyntip ba ka sorkar ka iengskhem ha kaban pynbeit ia kane ka mat da kaba bud ryntih ia ka ain bad ban pynthikna ba ki nongdie madan kiba dei hok ha Khyndailad kidei ban ioh ia ka Certificates of Vending (CoV).
Katkum ka jingong ka jongu, ki nongdie madan kiba la shah pynkynriah kila pynpaw ia ka jingsngewhun bad ki jingpyrshang jong ka sorkar, ha kaba kila kyrpad ban pynbiang ia kiwei kiwei ki jingdonkam kum ka bording elektrik, ka um bad ki painkhana.
“Ngi lah pynthikna ia ki ba ngin shimkhia ia ka jingsngewkhia ka jongki bad ngi la pyrshang ban ai jaka ia baroh ki nongdie madan kiba dei hok” ula ong.
Nalor kane u Bah Dhar ula pyntip ba ka sorkar kan bteng ban leh ia ka sorjamin bad ithuh shuh shuh ia ki jaka ha kylleng ki thain ban buh ia ki nongdie madan.
=============
