Agartala, Jylliew 15: Ka jingiakhih ba jai jai jong ka Tripura Indigenous Students Federation (TISF), kaba dei ka Student Wing jong ka TIPRA Motha, kala poi sha ka jingkulmar kaba jur hadien ka jingpyni bor jong ki Pulit, kiba la siat tynsong lyer sat khmat bad kynshait um khlem da ai kano kano ka jingmaham.
Kane ka jingiakhih ka dei kaba jia ha ka sngi Balang ban dawa ia ka Sorkar ba kan pynrung ia ka Roman script haba thoh eksam ia ka sobjek Kokborak.
Ia kane ka rally la pynlong ha Agartala bad ki nongiakhih kila pakhang ia ka surok ban leit sha kad Liengsuin kaba la neh haduh lai kynta eiie.
Ka khubor ka iathuh ruh ba katto katne ki briew na ka kynhun ki nongiakhih, kila lun maw bad bitor da kaba pyrshang ban pynbteng ia ka jingpakhang surok watla ka jingaipor jong ki bor district kala kut noh.
Ki 4 ngut ki nongialam ba mihkhmat ia ki nongiakhih, kila dep iakynduh ruh ia u Lat ka Jylla ban aiti ia ka dorkhas halor kane ka jingdawa jong ki.
Ha kane ka jingkulmar, hynriew ngut ki nongiakhih kila mynsaw bad la pynkit noh ia ki sha GB hospital ban ioh ia ki jingsumar.
Ki Nongialam ka TIPRA Motha kynthup u Nongialam ka Liang Pyrshah Animesh Debbarma, kila leit ban jngoh ia kine ki samla kiba la mynsaw.
Haba iakren bad ki nongthoh khubor, u Debbarma ula pynrem jur ia kane ka jingpynibor bad dawa ia u Myntri Rangbah ka Jylla Dr Manik Saha ban thung ia ka jingtohkit ha kabn ithuh ia ki briew kiba donkti ban pynmih ia kane ka jingkulmar.
