Shillong, Iaiong 15: U MP ka Rajya Sabha u Dr WR Kharlukhi hynne ka Sngi Baar ula pynthikna ban iakren bad ka sorkar pdeng halor ka jingdonkam ia ka North Eastern Indira Gandhi Regional Institute of Health & Medical Sciences (NEIGRIHMS) ban pyntreikam ia ka ratio kaba 80:20 ki kynthei-shynrang ha ka jingthung kam Nurse ha kane ka jaka sumar.
Haba iakren bad ki nongthoh khubor hadien ka jingiakynduh ia ka kynhun jong ka seng Hynniewtrep Youth Council (HYC), u Dr Kharlukhi ula ong, “Nga lah ong ia ki (HYC) ba ngan iakynduh ia ki 3 ngut ki MP bad ngan pyrshang ban shimkhia bad ki.
Ka mat kaba hakhmat eh (kaba kila pynsngew) kadei halor ka polisi thungkam ha ka NEIGRIHMS. Wat hapoh ka AIIMS ruh ki dang leh da ka ratio 80:20 kynthei-shynrang bad kiwei ki medical college ruh kila leh ia katei, kumta ngan sa shimkhia ia kane ka mat (bad ka sorkar pdeng)”.
Hashwa kane, u President ka HYC u Roy Kupar Synrem ula ong ba ka kynhun kala kyrpad ia u MP ka Rajya Sabha ban tuklar lem da kaba shimkhia bad ka tnad ka koit ka khiah jong ka sorkar pdeng ban pyntreikam noh mardor iaka Ratio kaba
80:20 kynthei-shynrang ha ka jingthung kam Nurse hapoh NEIGRIHMS.
“Ngi kwah ba yn shimkhia ia kane ka mat bad ka sorkar pdeng. Namar ba udei ruh uba mihkhmat ia ka seng kaba don bynta lang bad ka sorkar NDA ha Delhi, ngi kwah ba yn don lem ia ka jingkitkhlieh na ka bynta ki paidbah jong ka jylla. Lada ka AIIMS ka lah bna pyntreikam ia ka Ratio 80:20 ki kynthei-shynrnag balei ka NEIGRIHMS kam lah ban pyntreikam ia katei ka policy” ula ong.
“Ngi lah dep ban aiti ia baroh ki jingthoh ryngkat bad ka jingkyrpad ia u MP ba yn shimkhia thikna ia kane ka mat, khnang ba kan ym ktah ia ki kyrtong bad ia ka jinglong jingman hapoh ka NEIGRIHMS ha kaba iadei bad ka jingthungkam ia ki Nurse. Ula ai ka jingpynthikna ia ngi ha ka jingiakynduh, ba yn shimkhia thikna ia kane ka mat” la ong u Bah Roy Kupar Synrem.
Kane ka mat kala mih hadien ba ka NEIGRIHMS kala pynmih ia ka jingpynbna paidbah ne Advertisement ha ka 22 tarik u Kyllalyngkot 2025 kala iawer na ka bynta ban pyndap ia ki 105 Post jong ka Nursing Officer hynrei kam shym la kdew eiei ia ka Ratio jong ki kynthei ne shynrang kiban shah thungkam.
U Roy Kupar Synrem ula pyntip ba ka NEIGRIHMS kala phah da ka jingthoh sha ka Ministry of Health & Family Welfare ha ka 9 tarik u Naitung 2024 ban ai jingmynjur ban pyntreikam ia ka Ratio kaba 80:20 ki Nurse kynthei bad shynrang kumba la leh da ki jaka sumar ka Sorkar Pdeng kum ka AIIMS, New Delhi bad kiwei kwei ki jaka ai jingsumar jong ka Sorkar India kum ka ESIC Hospital kynthup ia ka Institute of National Importance kum ka JIPMER ha kaba 80% na ki kam Nursing Officer la bhah kyrpang na ka bynta ki nurse kynthei.
Hynrei ka Ministry lyngba ka shithi ha ka 08-08-2024 kala jubab da kaba ong, “Ka NEIGRIHMS kam dei ban bud ia katei ka kyndon kaba 80:20 (Kynthei: Shynrang) Nurse kumba la leh da ka AIIMS, NEW Delhi”.
“Kane ka jingai jingbthah ka Ministry ym tang ba kala ktah ia ka rukom pyniaid ia ki kam ki jam ha ka NEIGRIHMS hynrei kala ktah jur ia ka jingsngew jong ki nongpang kiba leit ban ioh jingsumar ha katei ka jaka ai jingsumar” ula ong.
Ula ong ba ka NEIGRIHMS ka don kumba 40 tylli ki tnad bapher bapher, ha kaba la thungkam ia ki Nursing Officer bad na kine ki don tang 3 tylli ki Tnad kidei kiba jaka sumar ia ki shynrang ne ki Male Ward.
 ban pyntreikam ia ka ratio kaba 80:20 ki kynthei-shynrang ha ka jingthung kam Nurse ha kane ka jaka sumar.){kind=link}