Pynkup burom ka Sorkar MDA ia u MP ka Rajya Sabha
Shillong, Jylliew 27: U MP ba thymmai ka Rajya Sabha James K Sangma ha ka sngi Thohdieng ula kular ia ki nongthaw Ain ba don ha ka Sorkar MDA ba un iatrei jan bha bad ka Sorkar Jylla ban lah mihkhmat kham bha bad pynsngew ia ki jingeh jong ka Jylla bad ka thain Shatei Lam Mihngi ha Parliament.
Ula kren ia kane hadien ka jingshah pynkup burom ha ka jingialang jong ka Meghalaya Democratic Alliance bala pyniaid da u Myntri Rangbah Conrad K Sangma.
U James ula shah jied khlem kano kano ka jingialeh pyrshah ban leit mihkhmat sha ka Iingdorbar Rajya Sabha.
“Nga ai khublei ia baroh ki Nongthaw Ain ka MDA namar ka jingai jingkyrshan kaba tylli kawei” ong u James Sangma.
“Ngan trei jan bha bad ka Sorkar Jylla ban pynthikna ba ia ki jingeh ka Jylla la pynsngew ia ka sur kaba jam hapoh Rajya Sabha”.
Ka jingialang ha ka sngi Thohdieng kala wanrah lang ia baroh ki paralok kiba don ha ka MDA, kynthup ki Nongialam ka BJP Alexander Hek Laloo bad Bah Sanbor Shullai, President ka UDP bad Myntri Sorkar Bah Metbah Lyngdoh, ki nongmihkhmat na ka HSPDP, kiwei ki Myntri Sorkar bad ki MLA lem bad u Lamphang ka Iingdorbar Thaw Ain Thomas A Sangma.
Haba kren sha ki lad pathai khubor, u Myntri Rangbah Conrad K Sangma ula ong ba kane ka jingia lang ka ai ia ki paralok ka kynhun synrop ia ka rynsan ban iakren ia ki kam kiba kongsan jong u paidbah, pan jingpynshai, bad ia ai markylliang ia ki jingai jingmut. Ula ong ba kum kine ki jingiakren ki pynkhlain ia ka jingiatreilang bad ka jingiashaniah mar kylliang hapdeng ki paralok ba iatreilang.
Haba ai khublei ia u MP ba thymmai, u Myntri Rangbah ula pynpaw ia ka jingsngewskhem ba u James K Sangma un long u “sur uba jam bad ba treikam na ka bynta ka Jylla ha Rajya Sabha”.
Haba jubab ia ka jingkylli halor ka synshar khadar, u Conrad ula pynpaw ba watla ym don satia kanp kano ka Sorkar kaba lah ban pynbeit ia man ki jingeh ha ka shimiet, ka MDA kala leh shibun kiei kiei halor ki kam kiba la sahteng la slem bha.
Ula kdew ia ka jingpyndep ia ka Courtyard by Marriott Hotel ha Shillong- kaba la sahkut jan 35 snem – kum ka nuksa, bad kdew ia ki sienjam ba la leh ha ka jingpyniasoh surok, ka pule dangle, ka koit ka khiah bad ki jingtei na ka bynta u paidbah.
U Conrad ula pynskhem biang ia ka jingkut jingmut jong ka Sorkar ban pyntyllun sted ia ka roi ka par bad pynbha ia ka rukom im ki nongshongshnong ha Jylla.
