Shillong, Jylliew 12 : U Symbud Myntri Rangbah ba khmih ia ka tnad PWD (Roads) Bah Prestone Tynsong ha ka sngi Palei, ula kular ban pyntrei ia ka surok na Syntumaw sha Umdohkha kynthup kawei ka jingkieng heh halor ka wah Umsiang, ha ka shnong Pahamdiengngan, ka ban ai jingmyntoi ia ki 22 tylli ki shnong ka Ri-Bhoi District.
“U (Bah Tynsong) la kular ia ka kynhun ba un sa shimkhia ban pyntrei noh mar mar. Ngi la iakren sani bha bad ngi kyrmen ba yn kynthup ia ka hapoh ka PMGSY-IV ha une u snem mang tyngka ba mynta” ong u MLA ka UDP na Nongpoh Bah Mayralborn Syiem haba iakren bad ki nongthoh khubor.
U Bah Mayral ha ryngkat u MLA ka NPP na Mawhati Bah Charles Marngar, kila ialam ia ka kynhun jong ka Joint Action Committee ki 22 tylli ki Shnong bad aiti ia ka dorkhas sha u Bah Prestone ba un tuklar bad leh ia kaba donkam.
Ka JAC kala ong ba ka surok na Syntumaw sha Umdohkha (10km) ka dei kaba kongsan bha namar ka dei tang kane ka surok kaba pyniasoh ia ki 22 tylli ki Shnong sha ki jaka iew, ki skul, ki jaka sumar bad ki ophis ka Sorkar.
“Ia mynta, ka jingbym biang ka surok ban iaid kali kala wanrah ia ka jingeh kaba khraw khamtam ha ka por lyiur, naba ka surok ka ktieh, syntuid bad ym long ruh ban iaid. Kane ka ktah ym tang ia ka jingkit ia ki mar kimat bad haba jia ki jingjia ba kyrkieh hynrei wat ia ka iaid ka ieng ki khynnah skul, ki tynmen ki kro bad kiba pang ba shitom. Ngi ngeit skhem ba ka jingshna ia kane ka surok ba 6km ka jingjrong, kan wanrah ia ka jingkylla ha ka roi ka par hapoh ka thain jong ngi, pynbha ia ka leit ka wan, kyrshan ia ka kamai jakpoh ki jaka nongkyndong bad kyntiew ruh ia ka ioh ka kot ka thain” kila ong ha ka dorkhas.
 Bah Prestone Tynsong ha ka sngi Palei, ula kular ban pyntrei ia ka surok na Syntumaw sha Umdohkha kynthup kawei ka jingkieng heh halor ka wah Umsiang, ha ka shnong Pahamdiengngan, ka ban ai jingmyntoi ia ki 22 tylli ki shnong ka Ri-Bhoi District.){kind=link}