Shillong, Risaw 20: U President ka Meghalaya Government Lower Primary Contractual Teacher’s Association (MGLPCTA) bah Birbor Riangtem ula iathuh ba naka liang u Symbud Myntri Rangbah ka jylla BahPrestone Tynsong, ula kular ban shimkhia iaka jingeh ki nonghikai kontrak bala shah weng kam bad ban pynsngew ia ka jingeh jong ki sha ka Kynhun Myntri.
Haba kren sha ki lad pathai khubor u bah Birbor ula ong ba ki Nonghikai kontrak hynne ka sngi kila kynduh ia u Symbud Myntri Rangbah ban pynsngew iaki jingeh ba ki nonghikai ki ia kynduh naduh ba kila shah wengkam.
U bah Birbor ula iathuh ba naka liang u bah Prestone watla um pat lah ban kular eiei naka bynta ki nonghikai kontrak hynrei ula ong baka sorkar kan sa shong jingialang ban iakren kumno ban thaw iaki lad ba ka sorkar ka lah ban iarap naka bynta ki nonghikai.
“U Symbud Myntri Rangbah ula kular ba un sa pynsngew iaki jingeh jong ki nonghikai shaka sorkar bad kumjuh ruh shaka jingialang ka Kynhun Myntri Sorkar naka bynta ban lah ban iarap” ong u bah Birbor.
U bah Birbor ula ong ba naka liang ka sorkar kam lah ban kular ban thungkam biang iaki nonghikai kontrak hynrei kan wad ia ki ladki lynti ban iarap katba lah.
