Shillong, Iaiong 04: Ki dkhot ka Hynniewtrep Youth Council (HYC) hynne ka sngi Thohdieng, kila leit ban phah mih ïa u Director ka Hospital NEIGRIHMS, u Prof Nalin Mehta na ophis treikam jong u.
Hashuwa kane ki dkhot ka HYC kila phah mih lut ia baroh ki nongtrei na ophis treikam jong ka Administrative Block ka NEIGRIHMS.
Kane ka jingleh ka HYC kadei hadien ba u Director ka NEIGRIHMS um shym la lah ban jubab iaka jingdawa ka seng ban pynkylla iaka thup kam kaba lait ban mang 7.5% (8 seat) ia ki samla ha ka thup Schedule Tribes (ST).
Hashuwa ban mih u Director na kamra treikam, kala don ka jingianai bad ka jingiapynibor hapdeng ki nongpahara bad ki dkhot ka HYC habar ka kamra u Director.
Ha ka jingïalam da u President ka HYC u Bah Roy Kupar Synrem ki dkhot kila iakren bad u Director u Prof Nalin Mehta bad ula kohnguh ban mih sha bar ban ïakren.
Hadien katto katne minit bala ïakren ha bar ka Administrative Block, na ka liang u Director ka NEIGRIHMS u la khot ia ki nongialam ka HYC ban ïakren ha Conference Room.
Haba kren sha ki lad pathai khubor hadien ka jingkren bad u Director ka NEIGRIHMS, u President ka HYC u Bah Roy Kupar Synrem u la pyntip ba ka seng ka la ioh ia ka jingthoh ia ka jingpynthikna na u Director ba ka NEIGRIHMS kan pynlong noh iaki eksamin thungkam hapoh Meghalaya ha ka jingpynïaid da ka Company HLL kaba la ithuh da ka Sorkar Pdeng.
U Bah Roy u la ong ba kawei na ki mat jingdawa ba kongsan ba ka HYC kala dawa na ka NEIGRIHMS ka long ban pyntreikam ia ka bhah thungkam Nurse kynthei bad shynrang kata ban mang 80:20 kumba la leh ha AIIMS bad kiwei ki jaka pule ba heh.
“Ha kaba iadei bad kane, u Director ula pynthikna ba un thoh mardor sha ka Ministry of Health ka Sorkar Pdeng ban ioh ia ka jingshai ne ka jingmynjur la ka NEIGRIHMS ka lah ne em ban pyntreikam ia kane ka jingmang kyrpang 80:20 naka bynta ki Nurse kynthei bad shynrang” la ong u Bah Roy.
U Bah Roy u la ong ba haduh mynta ka NEIGRIHMS kam don ia ka Recruitment Rules (RR) halor ka bhah mang kyrpang na ka bynta ki Nurse kynthei bad shynrang bad namar kata ka Hospital ka donkam ban ioh jingmynjur shwa naka Ministry of Health ka Sorkar Pdeng.
“Hynrei ngi la kren shai bha bad u Director ba ngin ym ailad ïa ka rukom thung kam ban ïaid shakhmat lada ïa ka jingdawa ban ïoh ïa ka bhah kyrpang 80:20 na ka bynta ka kam Nurse kynthei bad shynrang” ula ong.
U President ka HYC u la pyntip ruh ba ka Seng kala dawa ba ka Hospital kadei ban pyntreikam noh ia ka 44% Reservation na ka bynta ki samla riewlum ne ST kumba la buh da ka OM jong ka Ministry of Personnel ha kaba ka NEIGRIHMS ka la shim iaka sienjam ban pyntreikam.
