Shillong, Naiwieng 12: U Myntri ka Sorkar Pdeng ba khmih ia ka Tnad Pule Puthi Dharmendra Pradhan, ula ai ka jingkular hakhmat u Myntri Rangbah ka Jylla Conrad K Sangma hynne ka janmiet sngi Ba-ar, ba un wad ia ki lad ki lynti ban pynkut noh ia ki kynrum kynram kiba mih ha North Eastern Hills University (ENHU).
Ia kane la pyntip da u Myntri Rangbah ka Jylla Conrad K Sangma haba sam ia ka khubor lyngba ka social media ‘X’. Ula ong ““Nga la ioh pdiang ia ka phone call na u Myntri ka sorkar Pdeng uba khmih ia ka Pule puthi @dpradhanbjp, uba la ia ka jingpynthikna ban wad ia ki lad ki lynti ban pynbeit ia ka jingjia hapoh NEHU. Nga kwah ban ai khublei ruh ia u Lat ka Jylla halor ka jingtuklar ka jongu”.
Received a call from Hon’ble Minister Education @dpradhanbjp, for his assurance to find a resolution to the current issue of NEHU.
Would like to thank Hon’ble Governor for his intervention.
— Conrad K Sangma (@SangmaConrad) November 12, 2024
Ka seng ki samla pule North Eastern Hill University (NEHUSU) bala kyrshan ka Khasi Students Union (KSU – NEHU Unit) kila shong shah thngan naduh ka 5 tarik u Naiwieng nalor ka jingkhang dam ia ka skulbah naduh ka 6 tarik u Naiwieng bad kala don ruh ka jingpyrkhing ia ka jingrung jingmih ki briew hapoh katei ka skulbah. Ki samla pule kila dawa ba u Vice Chancellor udei ban hiar shuki noh bad dei ban weng kam mardor ia u Registrar bad ia u Deputy Registrar.
U VC ka NEHU u Prof. Prabha S. Shukla um shim la don ha katei ka skulbah naduh ka miet jong ka sngi saitjaiñ, ka miet kaba ka jaka sah ka jongu kala shah lun maw ha ki riewshimkabu ha ka por shiteng miet bad mynta u VC u don ha ka jaka ia kaba ym shym la pynpaw na ka bynta ka jingshngain bad la ong ba u shngain bad u bit u biang.
Ha ka sngi Baar, ka jingshah thngan kala jam sha ka sngi kaba phra hynrei ka jingiapyneh ka dang iai bteng.
Hapdeng jong kane, ki tyllong khubor kila iathuh ba u VC Shukla u lah ban shim shuti shwa shipor hynrei ym shim la tip pat haduh katno yn shim shuti hynrei kan long pat kaba jrong ka jingshim shuti ka jongu.
Haduh mynta kila don 12 ngut ki samla pule kiba la shah rah sha hospital ban ioh jingsumar hadien ba kim shym la don ha ka met kaba koit ba khiah na ka jingshah thngan.
Ha ka sngi Nyngkong u Vice Chancellor ula lum ia ka jingialang jongka Executive Council (EC) da kaba shu leh Online ban shim ia ki rai kiba kongsan kaba kynthup ban thung ia ka ‘Institution Inquiry kaban khlieh da u Nongbishar barim ne IAS/IPS ophisar kiba la shongthait na ka kam, ha kaba iadei bad ka rukom treikam jongu Registrar bad Deputy Registrar. Kiwei pat ki rai kiba kongsan kiba la shim, ka long halor ka jingthung ia ki Pro VC ka Shillong bad Tura campus ia kaba u VC ula pynthikna ba kin sa jia noh shen.
.){kind=link}