Shillong, Rymphang 27: U Myntri Rangbah ka Jylla Conrad K Sangma ha ka sngi Ba-ar, ula kular ia ka jingshngain bad jingiada ia ki paidbah ba sah ha ki jaka khappud bad ka Assam namar ka jingiaid leh donbor ki shitniam Hindu ia ki skul Missionary ha Assam.
U Myntri Rangbah ula pynpaw ia kane haba jubab ia ka zero hour notice bala wanrah da u MLA ka UDP na Nongpoh Bah Mayralborn Syiem halor ka rai jong ki kynhun shitniam Hindu kiba la leit tah poster kylleng ka Assam ba bthah ia ki skul Missionary ban weng lut ia baroh ki mot niam bad ki Iingmane na ki jaka jong ki bad ban sangeh pyndonkam ia ki jaka pule na ka bynta ka niam.
“Ngin sa pyntip ia ki Superintendent of Police bad ki DC ba kin pynkhlain ia ka jingiaid pahara ka ban pynthikna ba ki paidbah kin ioh ia ka jingshngain bad ba kin ioh ruh ia ki jingiada lada dei ban mih kano kano ka jingjia” ula ong.
“Hynrei, kam dei pat ia nga ban leh eiei khlem da wad ia ka jingshisha. Namar kata, ngi donkam ban pynshisha shuwa ia kane ka khubor bad ki jingtip shuwa ba ngin leh eiei” ula bynrap.
Nalor kane,u Myntri Rangbah ula ong ba u ju iakren khari khari bad u Myntri Rangbah ka Assam Himanta Biswa Sawma bad kumjuh ruh hapdeng ki Chief Secretary jong ki ar Jylla.
