Nongpoh, Nailar 16 : U Myntri Rangbah ka Jylla Conrad K Sangma, ula khlei ia ka jingkular hakhmat ki riew rangbah ka thain Mawhati, ba shen un sa pynbna ban pynurlong noh ia ka jingdawa u paidbah ha ka ban buh ia ka Community & Rural Development (C&RD) Block ha Mawhati.
Kane ka jingkular kala mih ha ka jingleit iakynduh jong ki riew rangbah ka thain bala ialam da u MLA ka Mawhati Bah Charles Marngar, ia u Conrad Sangma hynne ka sngi thohdieng ha Shillong.
U Myntri Rangbah ka Jylla ula pyntip ba ka Sorkar kala pdiang ia ka jingtyrwa ban pynkha ia ka C&RD Block ha Mawhati bad ngin sa sdang noh ia ka kam ban pynkha ia ka Block thymmai khnang ba ki paidbah kin ioh ia ka jingshakri kaba kham bha bad ioh ia ki skhim bapher bapher ka Sorkar.
“Nga sngew tynnad ban pyntip sha ki paidbah ka Mawhati ba nga la pdiang ia ka jingtyrwa bad ngin sa sdang noh ia ki kam ban pynkha ia ka Block thymmai ha Mawhati” ong u Conrad.
U MLA Bah Charles Marngar u pyntip ba ha kane ka jingiakynduh, ki mat kiba la iakren ki kynthup ia ka C&RD Block ha Mawhati, ka surok (Intermediate road) na Sohnidan sha Umsiang, ban kyntiew kyrdan ia ka Mawrong bad Sohnidan Sub Centre sha ka PHC bad kiwei kiwei ki surok ba dang sahteng hapoh ka Mawhati constituency.
U Bah Charles ula ai khublei ia u Myntri Rangbah ka Jylla halor ka jingkular ban sa pynbna noh shen ia ka C&RD Block ha Mawhati.
Ula pyntip ba u Myntri Rangbah ula ai jingtip ruh ia ka jingmang pisa jong ka Sorkar ban shna pynbha ia ka surok na Sohnidan sah Umsiang bad kiwei kiwei ki kam pynroi kum ki skul ha ka thain Block-II.
Haba phai sha Block-II, u Bah Charles u pyntip ba la pynsngew ruh hakhmat u Myntri Rangbah ia ka jingdonkam ban buh noh ia ki skul Sorkar ha Block-II khamtam ha ki 7 tylli ki Shnong ki bym pat don ia ka skul kaba bit kaba biang.
Nalor kane, kila iakren ruh ia ki surok kiba don ha ka thup jong ka PMGSY Phase-III ba kynthup ia ka surok Mawrong ba 17 Km, ka surok Pamlatar ba 8 km, ka surok Lymphuid ba 16 km bad ka surok Mawlasnai sha Kdohhati ba 20 km.
