Shillong, Nailur 16 : U Myntri Rangbah ka Jylla Conrad K Sangma ula kular ban kem bad pynioh ia ka jingpynsajia kaba tyngeh ia ki briew ba donkti ha ka jingpyniap ba dang shen ia i Khynnah kynthei ba 4 snem ha Nongrah Nonglum.
Haba kren sha ki lad pathai khubor ha ka sngi Ba-ar, u Conrad ula phah ia ka jingsngewlem sha ki bahaiing hasem jong ine i Khynnah ba khlad.
Ula pynpaw ia ka jingshaniah skhem ha ka jingtohkit ki Pulit bad ong ba ki bor khmih kila trei khlem shongthait ban lap ia ki briew ba donkti.
“Nga phah ia ka jingsngewlem sha ki bahaiing hasem namar kaei kaba la jia ka dei ka bym iahap satia” ula ong.
Haba pyntip ba ki Pulit kila trei khlem shongthait ban iohkem ia kiba donkti, u Myntri Rangbah ula ong “La iathuh ia nga da u Symbud Myntri Ragbah ba ki Pulit kila sdang ia ka jingtohkit. Ngam lah ban kren ia mynta namar ka dang don ha ka jingtohkit hynrei u Symbud Myntri Rangbah ula pyntip ia nga ba ym slem yn sa ioh kem ia kiba donkti”.
I heprit Insaphira Lyngdoh Mawnai ila jah rngai nala iing na Nongrah Nonglum ha ka step Sngi U Blei. Ia ka met jong I la lap ha ka step kaba bud, bala pynngam ha kawei ka jaka ba lang um slap jong ka Iing ba dang shu shna thymmai, kaba don marjan ka Iingsah jong i.
Ki Pulit ka East Khasi Hills kila thung ia ka Special Investigation Team (SIT) ban tohkit ia kane ka jingjia. Ia ka SIT la khlieh da u SP(City) Bah Herbert Kharkongor hapoh ka jingkhmih bad jingaibuit jong u Superintendent of Police ka East Khasi Hills.
Ki Pulit kila tohkit ia ki nong sakhi bad nang lum ia ki sakhi satar ban lah ithuh ia ki briew kiba donkti ban leh ia kane ka kam bymman.
