Shillong, Lber 04 : U Myntri Rangbah ka Jylla Conrad K Sangma ha ka sngi Ba-ar ula kular ban sa iakren bad ka kam biang ia ka Border Area Development Programme (BADP) hapoh ka Jylla.
Haba jubab ia ka motion bala wanrah da u MLA ka UDP na Nongpoh Bah Mayralborn Syiem ha Iingdorbar, u Conrad ula ong ba ka BADP ka dei ka prokram kaba kongsan bha ha ki jaka khappud bad kiwei ki Ri ba marjan.
“Ngi la ioh pdiang ia ka song pisa ba T.40-50 klur ha kine ki khyndiat snem…” ula ong haba bynrap ba hadien kata, u Myntri kam pohiing lyngba ka shithi ula pyntip ba ka BADP kan dang iai bteng tad haduh ka 30 tarik Nailur 2022 namar ia kane ka prokram yn hap ban shong bishar biang da ka Ministry.
“Ka dei hangne ba kane ka prokram kala kut noh. Ngi ju iakren beit bad ka Sorkar India hynrei ngim pat ioh ia ka jingpynthikna na ki, kumta ngi dang iakren khlem sangeh bad ka Sorkar India” ula bynrap.
Nalor kane, u Conrad ula kular ba un sa iakren bad ka Sorkar India ban pynthikna ba ka Meghalaya kan shah kynthup ha kane ka village prokram na ka bynta ka jingmyntoi jong ki briew kiba sah ha ki jaka khappud.
Ha kajuh ka por, u Myntri Rangbah u pyntip ba ki iew khappud (border haat) kila sdang plie biang ha kiba bun ki jaka jong ka Jylla.
 hapoh ka Jylla.){kind=link}