Shillong, K’lyngkot 05 : U Myntri Rangbah ka Jylla Conrad K Sangma hynne ka sngi palei, ula pynbna baka South East Khasi Hills Distict kan sa urlong noh shen bad ka District Headquarter kan dei ka Sohra.
U Myntri Rangbah ula pynbna ia kane hakhmat ki Nongialam ka Sohra District Demand Forum (SDDF), ha ka jingialang bala pynlong ha Circuit House, Saitsohpen, Sohra ha ka jingiadon ryngkat u Symbud Myntri Rangbah ka Jylla Bah Prestone Tynsong.
Haba ai jingkren ha ka jingialang, u Myntri Rangbah ula ong ba ka Sohra ka dei ka jaka kaba kongsan bha ha ka khana ka pateng jong ka Jylla khamtam haba phai na ka liang jong ki kam jngohkai bad kiwei kiwei.
“Ka Sohra ka dei ka jaka ba kongsan bha ha ka ioh ka kot jong ka Jylla bad ki Nongshongshnong bad ka Sorkar kala pyrshang kat kaba lah ban pynthikna ba baroh ki kam pynroi kin poi sha man ki kyndong ki kynshrot jong ka thain ha kat kaba lah” ong u Conrad.
U Myntri Rangbah ula ong ruh b aka East Khasi Hills ka dei ka District kaba heh bha haba phai sha ka jaka bad ka jingdon ki nongshongshnong bad namar kata, ka long kaba donkam ban phiah noh sa ia kawei ka District namar kam long kaba suk haba phai sha ka synshar khadar.
U Conrad ula ong ba ka Sohra kala dei ka Civil Sub Division bad kala don lut ia baroh ki jingtei kiba donkam na ka bynta ka District hadien habud haba pyntip ruh ba ka Sorkar Jylla kala iakren la slem halor ka jingpynkha District thymmai hapoh ka thain.
U Conrad ula bynrap ba ki don shibun ki jingtynjuh haba phai sha ka jingpynkha ia ka District thymmai ha Sohra khamtam haba phai sha ka jinglong ki jaka, ka jingdon ki riat bad ka jingpynhap lang haduh lai tylli ki jaka ba iasoh da ka riat kaba kynthup ia ka Mawsynram, Sohra-Shella bad ka Pynursla.
“Ngi sngewthuh ia ka jingdonkam ban wanrah shajan ia ka jingshakri jong ka sorkar sha ki paidbah hynrei ha kajuh ka por ngi donkam ruh ban pynthikna ba ngi leh ha ka rukom kaba dei khnang ba lashai lashisngi, ngim dei ban long ki nongshah kynthoh na kano kano ka thain halor ka rai kaba ngi shim” ula bynrap.
U Conrad ula pynpaw ha ha ki por bala leit noh bad ha ki jingialang bala dep, ka Sorkar kam shym la lah ban shim ia ka rai haba iadei bad ka jingdawa ia ka Sohra District bad ka daw ka dei namar kiwei ki thain kim pdiang satia ban iadon bynta lang ha ka Demand Committee hynrei ka Sohra ka don ia ka nongrim namar ka don ia baroh ki Ophis Sorkar kiba pynsuk ban kyntiew kyrdan sha ka District.
“Ta ka daw, ka jingdawa ka dei kaba shonghok bad ka hap ban iaid ha kane ka lynti hynrei donkam pat ban ai por, ka Kynhun Myntri ka Sorkar Jylla ka donkam ia ka por khnang ba kan nym leh ia kano kano kaba bakla namar ki don shibun ki kam ba hap ban leh, hap ban leh shibun ki jingkhein jingdiah shuwa ban shim ia ka rai kaba khatduh. Hynrei nga kular ha phi ba ngi la iaid ha ka lynti kaba dei” ong u Conrad.
