Shillong, Rymphang 20: Ka Bharatiya Janata Party (BJP) hynne ka sngi kala pynbna ban tei daka ‘Film City’ hapoh Meghalaya lada ka wan haka bor hadien ka elekshon MLA, ka ban long haka 27 tarik mynta u bnai.
Ia kane la pyntip da u khlur ak phlim Bollywood bad Bhojpuri u Ravi Kishan uba la ong ruh baka sorkar pdeng haka jingialam u Myntri Rangbah duh ka ri u Narendra Modi, ka don ia ka thong ban kyntiew iaka kam ap phlim ha Meghalaya.
Haba kren sha ki lad pathai khubor u Ravi ula ong ba ka jylla Meghalaya ka paw nam bha hapoh ka pyrthei haka liang ka put ka tem, ka kam ak phlim bad kiwei de hynrei ka jylla ka dang duna ha ki lad ban iarap iaki samla ban kyntiew iala ka sap ba ki don.
U Ravi ula ong ba kum uwei na ki Actor ba paw hapoh India u kwah ban iohi ba ki samla ka Meghalaya kin kiew sha ka kam ak phlim, ban rwai ban shad bad kiwei kiwei de bad Ia kane lah ban pynurlong lada ka jylla ka don iaka jaka hikai pyntbit iaki Actor, ki nongshna phlim, ki nongrwai, ki nongshad bad kiwei kiwei de.
“U Myntri Rangbahduh ka ri u Narendra Modi ula kular ban tei daka ‘Film City’ ha Meghalaya lada ka BJP ka wan haka bor bad yn tei ruh daka National School of Drama ban hikai pyntbit iaki samla kiba kwah ban don bynta haka kam ak phlim bad kumjuh ruh ban kyntiew ia ki samla kiba don sap ha kiwei pat ki bynta” la ong u Ravi.
U Ravi ula ong ba ka kam ak phlim kadei kawei ka lad kaba kyntiew bha iaka ioh kam ioh jam namar ka kam ak phlim, ka donkam shi bun ki briew naka bynta ban pyndep iaka jingdonkam hashuwa ne hadien ba la dep ban shna ia kawei ka phlim.
Ula bynrap ba ki samla ka jylla kiba donsap haka rwai, ban ten, ban shad, ban shna Film, ban pynbhabriew, ban suh jain bad kiwei kiwei de ki lah ban shim kabu na kane ka ‘Film City’ ka ban shna ha Meghalaya lada ka BJP ka wan haka bor.
