Shillong, Nailur 03: U Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem hynne ka sngi Ba-ar, ula kubur ba kala don ka jingtyrwa na ki nongialam bad ki nongkyrshan ka NPP ba un leit iakhun noh iaka elekshon MDC ban wan na ka Nongthymmai Constituency.
“Kala don shisha ka jingtyrwa ia nga ban iakhun noh ia ka elekshon MDC na Nongthymmai constituency” ong u Bah Pyniaid uba long u MDC jong ka Mawryngkneng Constituency, haba pynshai ia ki khubor kiba la saphriang ba u lah ban iakhun ia ka elekshon na Nongthymmai Constituency.
U Bah Pyniaid ula ong, “Kala don ka jingtyrwa na ki nongïalam bad ki nongkyrshan ka NPP na Mawryngkneng bad Nongthymmai constituency ban pynkohnguh ïa nga ban ïakhun ïa ka elekshon MDC na Nongthymmai constituency. Hynrei haduh mynta ngam pat shim rai ei ei ha kaba iadei bad ka jingkylla constituency namar ka long kaba kongsan bha ban iakren bad baroh ki nongtrei bad ki nongkyrshan ka seng”.
Ula iathuh, ba ha ka taiew ban wan kan sa don ka jingialang bad baroh ki nongtrei bad nongkyrshan ka NPP na Sohryngkham kaba hap hapoh ka Mawryngkneng constituency bad hadien ba la wai katei ka jingialang un sa shim ia ka rai.
U Bah Pyniaid ula ong, “Naduh ba kila shah rem ha ka elekshon MLA 2023, ki paidbah na Nongthymmai Constituency kila wan sha nga namar ba nga don ka ïing kaba hap hapoh ka Nongthymmai hynrei haduh mynta ngam pat shim kano kano ka rai kaba khatduh halor ka jingtyrwa ka jongki”.
