Shillong, Jylliew 15: Ka Nongbah Shillong, ka Nongbah jong ka Jylla Meghalaya ka dei kaba la ioh ia ka jingithuh kum ka Nongbah kaba khapngiah bad ba jur bha ka jingdheng kali haba ianujor bad kiwei ki Nongbah hapoh ka Ri bad ka daw jong kane baroh ka dei tang namar ka jingrit bad jingbun palat ki lad ba ki surok ki iatakhuh lang (intersection).
U Heh OPhisar Indian Police Services (IPS) uba bat mynta kum u Superintendent of Police (Traffic) ka East Khasi Hills u Shailendra Bamaniya, ula shim ia kane ka jingeh jong ka Nongbah Shillong kum ka jingtynjuh (challenge) ba un hap ialeh kum u Heh Pulit ba dei peit ia ka kam pyniaid kali, na ka bynta ban pynsuk bad pynaram ia ka leit ka wan jong ki paid Nongshongshnong.
“Nga shim ia kane ka jingeh ka Nongbah Shillong kumka jingtynjuh ha ka jingtreikam jong nga kum u Hehduh ki Pulit ba pyniaid kali bad ngan pyrshang katba lah ha kaban wad ia ki lad ki lynti kumno ban kham pynduna ia ki jingdheng kali ha kylleng ka Nongbah” ong u Shailendra haba iakren bad Ka Shlem.
Une u Ophisar IPS mynta la palat shibnai ula leit pyniaid kali ha kylleng ki jaka jong ka Nongbah Shillong bad ula pynlut por da ki kynta naduh mynstep haduh janmiet ban pyniaid ia ki kali ha Dhankheti, Laitumkhrah, Police Bazaarm Rhino Point, Rynjah bad Polo ba un sngewthuh khambha shaphang ka jingdheng kali hapoh ka Nongbah.
“Ha ka jingshem jong nga, kathain Police Bazaar bad Dhankheti ki dei ki jaka ba tasam bha ban pyniaid kali. Nga ai ka jing iaroh ia ki Pulit pyniaid kali kiba la trei shitom ban pynthikna ba ki kali kin ym sahkut shi jaka” ula ong.
Haba kylli, une u Ophisar IPS ula ong “Ka jingrit jongki surok bad ka jingbun ki lad ba ki surok ki iatakhuh lang ka dei ka jingeh ba hakhmat duh bad kaba ar hi ka dei ka jingbym biang ki jaka pynieng kali khamtam ha jan ki Skul bad ki Jaka Pule kiba don hapoh ka Nongbah”. Ula ong “ Ka jinglong ki surok hangne kila kynton ia ka jingeh baroh”.
“Ha kine ki shibnai tam, nga la shem ba ka jingdheng kali kaba jur eh ka dei ha ka por long skul bad por long trei bad ka daw hi ka dei ka jingbym biang ki jaka pynieng kali” ula ong bad bynrap “Phi lah ban iohi ia ka jingieng pathar ki kali ba leit buh bad shaw skul ia ki khynnah skul ha ki surok bad kumjuh ruh ki kali jong ki Nongtrei hajan ki Skul bad ki Ophis. Kine ki dei kiba pynwit ia ka jingiaid beit iaid suk ki kali ha kine ki jaka bad ktah palat ia ka jingiaid beit ki kali ha kylleng ka Nongbah Shillong”.
Une u Heh Pulit ula ong ba ka Nongbah Shillong kan hap ban wad lad wad lynti kumno ban pynbun ia ki jaka pynieng kali ban lait na ka jingpynieng kali kulmar ha ki surok bad ka jingdheng kali.
“Kan bha shibun ruh lada ki skul kiba don jaka ba kylluid, ba kin ai jaka lem iaki kali ba leit buh bad leit shaw skul ba kin pynieng ia ki kali khnang ban lah pynduna ia ka jingdheng kali” ula ong.
