TURA, K’lyngkot 9: U Bishop ka Tura Andrew Marak bad u Auxiliary Bishop ka Tura CJ Jose kila pynsngew hakhmat u Myntri ka Sorkar Pdeng ba khmih ia ki Jaidbynriew ritpaid u John Barla, ia ka jingbynniaw jong ki Khun Khristan halor ka jingshah thombor ki Iingmane Khristan ha Chattisgarh ha ki briew kiba la pynpra wat ia u mot jong u Jisu bad ka Mother Mary.
Ia kane la pynpaw da kine ki nongialam niam hakhmat u Barla uba la leit iuhkjat bad iakynduh ia ki ha Parish.
“Ngi la pynpaw ia ka ningsngewkhia halor ka jingthombor ia ka Iingmane ga Narayanpur, Chattisgarh bad ruh halor ka shithi ba dang shen jong ki Pulit Assam ba pan jingtip ia ki iingmane ha Assam” ong u Bishop Jose.
Kat kum ka jingong jong u, “ka Balang kam kyrshan ne pyrshah ia kano kano ka kynhun. Ngi dei kiba ieng pdeng bad ngi khuslai halor kine ki kam thombor.
U pyntip ruh ba ia kum kane ka jingsngew la pynpaw ruh ha ka jingialang jong baroh ki nongialam niam bad u Myntri kaba long ha Circuit House, Tura.
U Bishop ula pynpaw ruh hakhmat u Barla ba ki Khristan kila sngewkhia ia ka sienjam jong ki katto katne ki Jylla ban wanrah ia ka ain ba khang ia ki jingpynkylla niam, kaba la thew beit beit sha ki rit paid khamtam ki Khristan.
U Barla uba dei u Khristan (Catholic) ula pynpaw hakhmat u Bishop Jose ba un sa leit jngoh ia ka jaka ba shah thombor ha Chhattisgarh hadien ka jingjurip ia ka Rilum Garo bad ban pan jubab na ka sorkar halor ki kam jong ki rit paid.
U Barla ula ai ka jingiaroh ia ki synniang ba bun jong ki ka Balang ha ka liang ka pule puthi, ka koit ka khiah bad ki kam tei ia ka imlang sahlang.
