Nongpoh, Jylliew 15 : U Director General of Police (DGP) Dr LR Bishnoi ula pyntip ba ka jingdon jong ki nongdih droks ha Jylla Meghalaya kala kot ia ka 2 lak ngut mynta bad ong ba kane ka dei ka daw ka jingkiew ki kam sniew kam smeh hapoh ka Jylla.
Une u Khliehduh ki Pulit ula kren ia kane ha ka G20 Jan Bhagidari Event bala pynlong da ka Tnad Pulit ka Ri-Bhoi bad ka Union Christian College, Umiam hynne ka sngi Palei ha UCC Auditorium Hall, Umiam, kaba iatai halor ka phang “Drugs Abuse and Illicit Trafficking”.
Haba ai jingkren, u Dr Bishnoi ula pyntip ba haduh u snem 2023, ka jingdon jonng ki nongdih droks hapoh ka Ri India kala kot sha ka 3 klur ngut bad tang ha Jylla Meghalaya kala kot kumba 2 lak tam.
“Kane ka buh jingma shikatdei eh ia ka lawei jong ki samla bad ka imlang sahlang lem bad ka shongsuk shongshngain namar ka jingnang kiew ki kam sniew bad kam pyntriem bala donkti da ki nongdih droks” ula ong.
Kat kum ka jingong jong u, “Ka Tnad Meghalaya Police kala trei borbah ban iakhun pyrshah ia u droks bad kala shimkhia ruh ban pynlong ia ki prokram ban pynsngewthuh ia ki nongshongshnong khamtam ki Khynnah bad samla pule halor ki jingma bad ki jingktah jong u droks”.
“Ki Khun Samla ka Jylla ki dei ban tip shai ia ka jingma kaba mih na ka jingdih ia u drok bad ki dei ban kiar lai lum lai wah na une u jingdih ban lait na ki jingeh kiba ha rukom ha ka lawei ka jong ki” ula ong.
Haba pyntip ba ki Pulit kila kem ia bun ngut ki Nongkhaii droks bad kumjuh ruh ki nongdih droks, une u Heh Pulit ula ong “Ki Nongkhaii kila jyllei bha mynta ha Jylla bad kane ka dei ka jingma ia ka lawei jong ki Khun Samla, kaba ktah bha ruh ia ka imlang sahlang”.
U Dr Bishnoi ula pyntip ba ki don arjait ki droks kiba pynsniew bha mynta bad uwei u dei uba pynmih na ki jingthung lane narcotics bad uwei pat ba pynmih lyngba ki jingshna ha ki laboratory bala tip kum ki Synthetic, uba ki Pulit kila shem jingeh bha ban iakhun pyrshah ne ban pynduh jait.
Da ki spah ngut ki Khynnah skul jong ki 3 tylli ki skulk a thain ba kynthup ia ka james Memorial Higher Secondary School, St Francis D’Asssi Higher Secondary School bad ka Union Christian Hr Sec.School kila wan iashimbynta ha kane ka prokram.
Hadien katei ka Awareness Program ki khynnah pule jong kitei ki 3 tylli ki skul, ki la ïoh ruh ba sakhi ïa ka Megha Shakti Drill ba la pyni da ka kynhun SF-10 Commando jong ki kynthei, ka jingthmu ban pyni ïa katei ka Drill ka long ban ai mynsiem ïa ki khynnah pule ki ba thrang ban long pulit ha ka lawei ka jong ki.
Kiba la iadonlang ha kane ka sngi ki kynthup ia u Giri Prasad, IPS, SP Ri Bhoi, u S Pasleiñ, DSP Ribhoi, Dr. RM Manih Principal UCC, Bah Arphra Banshan Kharkongngor, PO, NSS, lem bad kiwei kiwei ki heh ophisar na ka tnad Pulit.
 Dr LR Bishnoi ula pyntip ba ka jingdon jong ki nongdih droks ha Jylla Meghalaya kala kot ia ka 2 lak ngut mynta bad ong ba kane ka dei ka daw ka jingkiew ki kam sniew kam smeh hapoh ka Jylla.){kind=link}