Shillong, Naiwieng 28 : Ka Meghalaya kala kynjoh ia palat 10,000 tylli ki case jong ki briew kiba don ia ka jing pang HIV/AIDS ba kynthup ia 500 ngut ki Khynnah, pyntip ka Dr KL Iawbor, Project Director ka Meghalaya AIDS Control Society (MACS).
“Palat 10,000 ngut ki briew la test positive ia ka HIV/AIDS ha Meghalata, bad ka ima ba 500 ngut na ki, ki dei ki khynnah” ong ka Dr Iawbor haba iakren bad ki nongthoh khubor ha ka Sngi Thohdieng.
Ka East Jaintia Hills ka dei kaba bun eh ki nongpang HIV/AIDS, ha kaba bun na ki khynnah ba ngat ki dei kiba wan na ki longiing kiba duk.
“Ka daw ba hakhmat eh halor ka jingsaphriang ka jingpang ka dei namar ka jingiashongkha khlem ki jingiada bad bun ki briew kim shym la wan shakhmat ban leh test” ong ka Dr Iawbor.
Haba pynbna ba ka Jylla kala pynkhreh bha ban rakhe ia ka World AIDS Day ha ka 1 tarik Nohprah, ka Dr Iawbor ka la ban jur ia ka jingdonkam ban iashimlang ia ki jingkitkhlieh ha kaban tehlakam ia ka jingsaphriang jong kane ka jingpang.
“Une u khniang u dei uba ma bha bad ka dei ka kamram jong iwei pa iwei na ngi ban pynsangeh ia ka jingiabit khnang ba ngin lah ban pynlong ia ka Jylla bad ka Ri jong ngi kaba lait na ka HIV hapoh u 2023” kala ong.
Ka MACS kala pynlong ia ki rynsan ialap bad ki prokram ban leh test, ha kaba kala screen ia 6882 ngut ki briew bad shem ba 24 ngut ki dei ki HIV positive.
“Haduh 87% na ki case la shem na ki outreach program bala pynlong sha ki jaka ba idon jingma bha bad ki riew paidbah” ong ka Dr Iawbor haba bynrap “Don na ki, kiba la wan hi dalade bad don pat kiba phah da kiwei halor ka jingsuba ba ki lah ban don ia une u khniang jingpang”.
Ka MACS kala pynkhreh ban pynlong ia ka bike rally bad kiwei kiwei ki prokram ha ka 1 tarik Nohprah ha kaba u Myntri Rangbah ka Jylla Conrad K Sangma un long u kongsan, ban pynphriang ia ki jingtip bad jingkyrshan ia kito ki briew kiba im bad u khniang HIV/AIDS.
Ki Myntri Sorkar bad baroh ki MLA ka East Khasi Hills nalor ki skul hikai jong ki nos bad kiwei kiwei lem bad ki briew kiba don ia ka jingpang HIV kin iadonlang ha kane ka prokram.
.){kind=link}