Nongpoh, Nohprah 01: Ka District AIDS Control Officer ka Ri-Bhoi Dr E Kalwing kala pyntip ba ka jingdon jong ki nongpang HIV-AIDS ha Meghalaya kala kot sha ka 7835 ngut bad tang ha Ri-Bhoi District kila don haduh 538 ngut.
Kane ka Doktor kala pyntip ia kane ha ka jingrake ia ka World AIDS Day kaba long hynne ka sngi Thohdieng hapoh ka Audtorium Hall ha Umsning.
Kat kum ka jingong kane ka doktor, napdeng ki 539 ngut kiba ioh pang HIV-AIDS ha Ri-Bhoi, 332 ngut ki dei kiba la don hapdeng ka jingsumar.
Ha kane ka jingrakhe la wan ban pynshongkun da u Dr. Celestine Lyngdoh MLA ka Umsning kum u kongsan ha ka jingiadon ryngkat ka Dr. E Kalwing District Tuberculosis Ophis bad District AIDS Control Ophisar Ri Bhoi District, ka Dr. L Myrthong Deputy Director MACS Shillong, kong G Jyrwa Clinical Service Ophisar, District Integrated Strategy for HIV/AIDS, Rocky Kylla Chairman Umsning Town Dorbar, ki dkhot jong ka Seng RAWA lem bad kiwei kiwei ki riew rangbah.
Ki Nongkren kila ai ka jingpynshai halor daw kiba pynsaphriang ïa une u khniang jingpang HIV-AIDS bad ki la ai ruh ka jing batai ïa ki lad jingïada kumno ban kiar ban lait na ka jingïabit jong u ne u khniang jingpang, da kaba kyntu ruh, ba ki paidbah kim dei ban ibeiñ lane niewbeiñ ïa kiba ïoh ïa ka jingpang HIV hynrei ngi dei ban pynshlur ïa ki ba kin leit ban phah sumar sha ki jaka sumar.
Haba kren kum u kongsan, u Dr. Celestine Lyngdoh, u la ai ka jingiaroh ia ka tnad treikam sorkar kaba la shimkhia ban rakhe ia kane ka sngi kaba kyrpang ban iada ne rad dyngkhong ia ka jingpang HIV/AIDS na kane ka jylla.
U Dr. Lyngdoh, u la ai mynsiem ia baroh ki nongialam shnong ba ki dei ban mih shakhmat ban iatrei lang bad ka tnad ka koit ka khiah ban ialeh pyrshah khnang ba ngin lah ban rat diengkhong ia u ne u khniang jingpang na ka imlang sahlang.
