Shillong, Rymphang 19: U Myntri Rangbah ka jylla Assam u Himanta Biswa Sarma hynne ka sngi ula kob ba ka Bharatiya Janata Party (BJP) kan ialam iaka sorkar ha Meghalaya bad u Myntri Rangbah un dei hi naka BJP.
“U Myntri rangbah ka Meghalaya un dei naka BJP bad nga iai ban ia kane ba u Myntri Rangbah hadien kane ka elekshon ban wan un dei beit naka BJP” la kob u Himanta.
Haba kren haka jingialap elekshon ia u kyrtong ka BJP na East Shillong constituency u bah Wankitbok Pohshna, u Himanta ula ong ba ka sorkar Meghalaya kadei ban jubab shaei jah ka pisa bala mang daka sorkar pdeng ban tei iaki Medical College hapoh kane ka jylla.
U Himanta ula bynrap ba u kren ia kane, ym dei ba u kwah ban kynthoh iano iano hynrei baroh kidei ban tip baka sorkar pdeng kumba kala mang tyngka ia kiwei ki jylla, kala mang ruh naka bynta ka Meghalaya ban tei iaki Medical College.
“Baroh ki tip baka sorkar pdeng kala mang tyngka iaka Meghalaya ban tei iaka Medical College ha Tura bad Shillong hynrei haduh mynta kita ki jingtei kiban ai jing myntoi iaki paidbah kim paw satia, shaei la jah ka pisa baroh” la buh jingkylli u Himanta.
U Himanta ula ong ba mynta ka kynti ki paidbah ka Meghalaya kidei ban sngewthuh ba dei tang ka BJP ka ba lah ban wanrah ki kam pynroi kiba myntoi ia baroh namar ka sorkar BJP kam ju leh shilliang haba ia dei bad ki kam pynroi naka bynta ki paidbah bad ka jylla.
Shuh shuh ula kynnoh ba kane ka jingbym paw ki kam pynroi ne ki jingtei naka bynta ki kam pynroi ki ban myntoi iaki paidbah ka kdew ba ka don ka jingpyndonkam iaka pisa bala mang daka sorkar pdeng.
