Resubelpara, Rymphang 22 : U National President ka National People’s Party (NPP) Conrad K Sangma ula ong ba ka NPP kala nang khlain ha kine ki san snem katba kiwei pat ki seng sain pyrthei kila nang troin katba ki dang iaid ki sngi, kaba pyni ia ka jingshaniah jong ki paidbah ia ka party.
U Conrad ula kren ia kane na ki rynsan ialap elekshon ha Ri-lum Garo hynne ka sngi Balang. Watla kiwei ki seng sain pyrthei kila pynjur ia ka jingialap elekshon da ki jingkawang ktien ia ka Sorkar MDA ba ialam da ka NPP, hynrei u Conrad ula kiar na ki jingkawang ktieh kylliang pynban ula ban jur halor ka roi ka par bad ka jingsuk kaba ka Sorkar NPP kala wanrah sha ki paidbah ka Jylla ha kine ki san snem bad buh ruh ia ka bha ka miat bad jingangnud jong ki paidbah hakhmat eh ban ia kiei kiei baroh.
U Conrad ula ban jur ba ka NPP kala nang khlain nang khlain ha kine ki 5 snem bala leit noh katba kiwei pat ki seng sain pyrthei ba ialehkai pyrshah kila nang tlot, kaba pyni ia ka jingshaniah u paidbah ia ka party. Ula ong, dei namar kane, u sngewskhem ba ka NPP kan jop kput ha kane ka elekshon MLA ban wan, kaban ailad ia ka party ban thaw ia ka Sorkar ba marwei, kaban urlong tang arsien ha ka histori jong ka Meghalaya nalor ka APHLC kaba jop 32 seat ha ka elekshon 1972.
Hynne ka sngi Balang, u Conrad ula pynleit jingmut ha ki artylli ki constituency ka North Garo Hills-Resubelpara bad Mendipathar ban pan jingkyrshan na ki paidbah ia u Timothy D Shira kum u kyrtong ka Resubelpara bad u Marthon Sangma na Mendipathar.
Ha madan Daram kaba hap hapoh ka Resubelpara constituency, u Conrad ula kyntu ia ki paidbah ba kin iawanlang ha ka ban vote ia ka party kaba don ka mynsiem ban kitkhiah ia ka Meghalaya. “Ha u 2018, ka jinglong jingman ka sain pyrthei kala iapher bha bad kane kala kylla bha mynta. Kiba bun ki seng sain pyrthei ha Meghalaya kila nang tlot ha kine ki san snem katba ka NPP kala nang iohbor kumka seng sain pyrthei kaba khlain duh ha ka Jylla” ula ong.
U Conrad ula ong ba ka Congress kala khlain bha ha ka thain hynei mynta kala troin bha namar ki nongialam jong ka,kila phet sha ka Trinamool Congress (YMC). “Mynta ka Congress bad ka TMC kila ialap elekshon ban pynpawnam iala ka jong ka party, bad lada peit ia ka rukom iaid ialap elekshon, kim shym la lah satia ban thaw pyrthei” ula ong.
Haba kyntu ia ki paidbah ban da rai bha ha kane ka elekshon bad ban vote ia ka party kaba la pyni ia ka jingsngewkhia da kaba wanrah ia ki kam pynroi ha ka thain, une u Khliehduh ka NPP ula ong “Ka NPP kala pynurlong ia ki jingkular bala khlei ha u 2018 bad ka dang kwah ban wanrah shuh shuh ia ki kam pynroi bad ki jingmyntoi u paidbah. Ia ka NPP hi, ka jingdonkam u paidbah ka dei kaba hakhmat duh”.
U Conrad ula aikhublei ruh ia ka jingtrei shitom jong ki Nongialam ba thymmai, kiba la ai ka jingkyrshan ia ka NPP na kiwei pat ki seng sain pyrthei.
Haba iai ban ba ka NPP kan thaw ia ka Sorkar, ula ong ba ha u 2023 ka NPP ka ngeitskhem ban thaw ia ka Sorkar ba tang marwei.
“Ki jingkhein jong ngi na baroh kawei ka Jylla kala shai bha namar ki paidbah kila iamih ban ai ka jingkyrshan ia ka NPP. Ki paidbah ka Ri-lum Garo kila lah ban im hapdeng ka jingsuk ha kine ki san snem bala leit noh. Kam shym don satia kano kano ka jingpynthut ia ka shongsuk shongsain. Kam shym don satia ki kam rahbor, kam dawa pisa ha ka thain haba ianujor bad kiwei kiwei ki snem. Ki paidbah kila mad ia ka jingsuk ha ka jingim.
Mynta, ngi hap ban khmih ba kano ka seng sain pyrthei kan iai bteng ban pynthikna ia ka jingsuk ha ka Jylla” ula ong.
U Conrad ula pyntip ruh ba ka Sorkar India kala don jingmut ban wanrah ia ki ain bapher bapher ki ban ktah ia ka hok jong ki paid riewlum ha ki jaka riewlum hynrei ka NPP kala leit ban iakren ban pynsangeh ia kine ki ain ba kin treikam hapoh ka Jylla.
“Ki paidbah ka Ri-lum Garo kim dei ban shah ia kino kino ki seng sain pyrthei bad iai bteng ha kaban kyrshan bad pynkhlain ia ka NPP namar tang ka rai u paidbah ka ban pynthikna ba ka NPP kan iai bteng ban theh kyrhai ia ki jingmyntoi jong ki paidbah bad ban wanrah ia ki kam pynroi” ula ong.
