Shillong, Rymphang 28: U nongialam ka BJP u Bah Sanbor Shullai ula ong ba u don iaka jingkhmih lynti ba 20 ngut ki kyrtong ka BJP kin jop iaka MLA Election 2023 haka jylla Meghalaya.
“Katkum ka rukom pyrkhat jong ki nongialam ka BJP, namar ka jingwan pyniasoh jong ki MLA bad ka jingdon ia ki kyrtong kiba biang, ngi khmih lynti ba ngin jop haduh 20 seat ha kane ka elekshon MLA” ong u Bah Sanbor.
U Bah Sanbor ula ong, ki nongialam ka seng kin sa shong pyrkhat bad kiei ki seng saiñ pyrthei kiba ki kloi ban iatreialng naka bynta ban tahw iaka sorkar synroplang ha ka jylla.
“Ki nongialam ba ha khliehduh jong ka BJP, ki nongialam ka BJP kiba khmih ia ka Thaiñ Shatei Lam Mihngi bad u Myntri Rangbah ka Assam u Dr Himanta Biswa Sarma iaka jylla Meghalaya kin sa iatai sani bad ki seng aiu ngin iatreilang ban thaw iaka sorkar” ong u Bah Sanbor.
U Bah Sanbor ula ong, u Bah AL Hek ym lah ban kam dalade hi ba yn shimti iaka shuki Myntri Rangbah hynrei kin dei ki nongialam kiba hakhliehduh jong ka BJP bad khamtam u Himanta Biswa Sarma kiban shim ia ka rai mano ban leit shimti iaka shuki Myntri Rangbah.
Haba kylli la ka BJP ka dang treh ban iatreilang bad ka NPP watla kila ia kynthoh jur iwei ia iwei ha ki rynsan ialap elekshon, u Bah Sanbor ha ryngkat bad ka phuh samrkhie, u la ong, “Ha ka elekshon ym sngewphylla hi, ka elekshon kadei hi ka elekshon, haka sorkar ngi iatreilang hynrei hapoh madan pat ngi ia kynthah kawei ia kawei pat bad baroh u paidbah u tip, ba ka UDP ka kynthah iaka NPP bad ka NPP iaka UDP. Hynrei kaba sngewtynnad haka constituency ka jong nga, nga te ngam ju kynthah iano iano ruh bad ngam shym la wallam ia kino kino kino ki nongialam kiba hakhmat eh jong ka seng hynrei ki don ki nongialam na ka constituency hi”.
“100 naka 100 ngan jop don burom iaka elekshon na South Shillong Constituency namar ba nga la lah ba wanrah iaka shongsuk shongsaiñ bad ia ki kam pynroi ki bapher hapoh ka Constituency khamtam eh haba nga lah ban pynurlong ia ki jingangnud jong ki paidbah kiba la sahteng la palat 40 snem” ong u Bah Sanbor Shullai bad ka bynrap da kaba ong, “Ngam ju buh ksew ne pulit ha iing bad ki paidbah ki suk bah ban wan iakynduh ia nga bad dei namar ka jingieid ba kin pynjop don burom biang ia nga”.
