Shillong, K’lyngkot 13: U National Working President ka BJP u Nitin Navin ula pynpaw ia ka jingkyrmen ba seng kan leh bha ha ka elekshon MLA-2028 ha ka jylla Meghalaya bad kan jop palat ia shiphew ngut.
Ula pynpaw ia katei, ha ka jingialang bad u MLA ka BJP na Pynthorumkhrah u Bah AL Hek hynne ka sngi Baar ban iakren halor ka lynti iaid jong ka seng hapoh ka jylla Meghalaya.
Kane ka jingialang kala pynleit jingmut ha kaban pyniar ia ka seng bad ban pynkhlain ha ki shnong ki thaw lyngba ki kam pynroi kiba bunjait.
U Navin, uba la shimti dang shen kum u National Working President, ula pynpaw ia ka jingskhem jingmut ba ka seng kala nang roi hapoh Meghalaya.
Ula pynpaw ba ka BJP kala nang pynjur ia ka jingkyntu ia ki paitbah ka jylla ha kine ki snem kiba la dep.
Kumba long mynta, ka BJP ka don tang 2 ngut ki MLA kiba kynthup ia u Bah AL Hek bad ia u Myntri Sorkar u Bah Sanbor Shullai uba long u MLA ka South Shillong ha ka iing dorbar kaba don 60 ngut ki MLA ka jylla.
