Shillong, Rymphang 11 : “Nga kob ban iatai nia hakhmat u paidbah ia u Bah Sanbor Shullai. Shano ki jingkhein jong kine ki 15 snem?” ong I kong Angela Rangad hynne ka sngi saitjain haba pyllait paidbah ia ka People’s Action Plan jong ka South Shillong bad ka lynti ia ka Meghalaya ban phaikhmat sha ka jingai jingkhein thik pa thik, ka roi ka par, ka jingshngain bad ka hok ki paidbah.
Kane ka manifesto bala pynwandur ha ka dur jong ki kotkhubor, ka pynleit jingmut halor ki action plan ia ka South Shillong bad ka jingthaw ain ha Meghalaya. Nalor kane, kane ka manifesto ka kren ruh halor ki 5 tylli ki mat ban pyntreikam ha kine ki 100 sngi kum ka MLA la ka dei hapoh ka constituency lane hapoh Assembly.
Kum shibynta jong ka manifesto, I Kong Angela ila buh ia 5 tylli ki mat ba ila kut jingmut ban pyntreikam ha kaba I ong baka MLA Office kan long kum ka Public Authority bad kan ai lut ia baroh ki jingtip haba iadei bad ka jingpyndonkam ia ka song pisa ba ioh ki MLA bad kiwei kiwei ki sienjam kiba la leh, ia ki ban sa buh ha ka Portal ba long paidbah bad ka mobile app jong ka South Shillong khnang ba ki paidbah kin ioh ia ki jingtip ha kano kano ka por ba ki kwah.
I kong Angela ila kut jingmut ruh ban iakhun halor ka Minimum Wage (bai nongsngi ba rit-eh) jong ki nongbylla sngi bad ban thaw ia ka Welfare Board na ka bynta ki nongbylla iing bad kiwei kiwei kiba bylla sngi ba kynthup ruh ia ki rapido riders, swiggy, zomato, amazon.
Ka ong ba ka tulop kaba sah jong ka kan leit sha ka jingkular ba 100 sngi ban buh ia ka People’s Rights & Facilitation Center na ka bynta ki nongshongshnong ka South Shillong.
Ka kong Angela kala kut jingmut ruh ban leit wad jingsumar ialade bad ki bahaiing hasem tang na ki jaka sumar ka Sorkar haba ki iohpang bad ban nym pyndonkam satia ia ki light saw (red beacon) lada ka shah jied kum ka MLA.
