Nongstoiñ, Naitung 07: Ka FKJGP Riangpoit unit, ha ka sngi saitjaiñ ka la leit ai jingïarap sha ka ïing jong u Bah Seles Marshra bad I Kong Aimon Sohphoh, na ka shnong Riangpoit kiba don 5 ngut ki khun.
Kane ka ïing ka la mad jingjynjar namar baroh ar ngut shi kmie shi kpa, ki don hapdeng ka jingshitom baroh la palat 6 bnai tam ei ei. Kine ki shi kurim ki la shem jynjar ha kaba wat ïa ka bam ka dih, kila shu ap na kiba haïing hasem ryngkat ki para marjan.
Haba ioh jingtip ia kane, ka seng hapoh ka jingïalam jong u president bah Pius Puweiñ bad samla Shanbor Nongsiang Vice President ka circle, ryngkat ka jingsynran lang ki nongïalam ka FKJGP Maweit circle, kila leit ban ai jingiarap ia kane ka longiing.
“Kum ka seng kaba peit ïa ka bha ka miat jong ka shnong ka thaw, ngim lah ban shu peit da ki khmat. Hynrei da I bor barit kum ka seng lyngba ka jingïatreilang ki dkhot baroh, ngi la lah ban ïa lum ïa lang bad ngi la ïoh ban pyndep ïa kane ka kam”, ong u Bah Pius Puweiñ.
U la ong ruh, “Ka FKJGP Riangpoit unit ka ai ka jingkhublei kyrpang ïa ki nongïalam ka FKJGP Maweit circle, u sordar ka shnong bad ïa baroh ki dkhot jong ka seng, kiba ai ka jingïatreilang na ka por sha ka por. Ngi kitbok kit rwiang ïa kane ka ïing ba kan ïoh noh ïa ka jing koit jingkhiah nangne sha khmat”.
