Shillong, K’lyngkot 15 : U Myntri Rangbah ka Jylla Conrad K Sangma ula pynpaw ia ka jinglong ba kloi ban pynsdang biang ia ka jingiakren iasuk bad ka seng Hynniewtrep National Liberation Council (HNLC) hynrei ula ban jur ia ka jingdonkam ban shimkhia bad iatreilang na baroh ki kynhun ba don bynta.
Haba jubab ia ka jingkylli la ka Sorkar kan khot biang ia ka HNLC sha ka jingiakren iasuk, u Conrad ula ong “Ngin hap ban shong bishar ia kane ka bynta namar ki don ki plus bad minus, ka daw balei ba kim kwah ban bteng ha ki snem bala leit bad hooid ngi hap ban khot lang ia ka Sorkar India”.
“Kine ki jait kam ki dei satia kita kiba ngi lah ban sdang eiei mynta bad pynsangeh noh lashai. Ka don da ka lynti bad ki don bun ki kynhun ba don bynta, ki don bun ki bor Sorkar ba don bynta bad ki don shibun ki jingpynkhreh ba hap ban leh bad kumta, ngi donkam ban iasyllok bad baroh” ula bynrap.
U Conrad ula ong “Ia ngi, ka jingsuk ka long kaba kongsan, bad ngi kwah ban iohi ia ka jingsuk ba neh slem hangne ha Meghalaya. Na nga kum u Myntri Rangbah, kaei ka lynti ba hap ban shim nga long uba khreh ban pyniaid shakhmat hynrei ngi donkam ia ka jingshimkhia bad ka jingiatreilang bad ka jingkut jingmut na baroh ban lah pynurlong ia kane ka kam bad ban peit ba ngi kut ha ka lynti kaba dei”.
Haba iadei bad ka kyndon ba buh da ka HNLC ban map noh ia baroh ki kam bymman hashuwa ba kan mynjur ban sdang biang ia ka jingiakren iasuk, u Conrad ula ong “Kane ka dei kata kaba nga kren, ngam lah ban ong eiei ia mynta, nga hap ban khmih ia ka….ngim pat shim satia ia kano kano ka rai halor kane”.
Haba kylli, u Myntri Rangbah ula kular ba ka Sorkar kala shimkhia ia ki jingbyrngem ia ki nongialam sain pyrthei, kynthup ia u President ka VPP Ardent M Basaiawmoit.
“Ngi ju shimkhia beit ia baroh kine kiei kiei namar ka dei ka kam kaba khia bha…ka jingbyrngem iano iano ka dei ka kam ka bym lah ban pdiang da ka Sorkar” ula ong.
 hynrei ula ban jur ia ka jingdonkam ban shimkhia bad iatreilang na baroh ki kynhun ba don bynta.){kind=link}