Shillong, Nailar 13: Ka United Democratic Party (UDP) kala pynpaw ba ka long kaba la kloi ban iatreilang bad kino kino ki seng riewlum ba kynthup ia ka Voice of the People’s Party (VPP) na ka bynta ka bha ka miat ki paidbah bad ka jylla baroh kawei.
“Ngi la dep ban iakren bad baroh ki seng saiñ pyrthei riewlum bad haduh mynta ka thong jong ka Party ka dang ieng ban iatreilang bad baroh ki seng saiñ pyrthei riewlum na ka bynta ka bha ka miat jong ki paidbah bad ka jylla baroh kawei” la ong u General Secretary ka UDP u Dr Jemino Mawthoh haba iakren bad ki nongthoh khubor, hadien ka jingjied thymmai iaki nongkitkam ka Central Executive Committee jong ka UDP naka bynta ka samoi treikam 2023-2026 kaba la long ha ka nsgi Saitjaiñ.
Katba u President ka UDP u bah Metbah ula ong, ba ka Party haduh mynta ka dang iatreilang bad ka ka Hills State People’s Democratic Party (HSPDP) hapoh ka shatri jong ka Regional Democratic Alliance (RDA) da ka jingthmu ban pynkhlian iaka jingsngew riewlum bad kane kajuh ka jingkhang ka plie ruh ia ka VPP lada ka kwah ban iatreilang bad ka UDP.
“Ha ki sngi ban wan ka RDA kan sa shong jingialang biang ban iakren halor ki mat ba donkam naka bynta ka bha ka miat ki paidbah bad ka jylla baroh kawei bad haka juh ka por ban nang pynkhlain shuh shuh ia kane ka kynhun” ong u bah Metbah.
